Ölkə ərazisində toz dumanı müşahidə olunur
Bakı, 31 yanvar, AZƏRTAC
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamentinin mütəxəssislərinin apardığı monitorinqin nəticələrinə əsasən yanvarın 31-də gecə saatlarından başlayaraq ölkə ərazisində havada tozun miqdarının normadan artıq olduğu müəyyən edilib.
Nazirliyin mətbuat xidmətindən AZƏRTAC-a bildiriblər ki, hazırda tozun miqdarı sanitar normadan 2,4 dəfə çoxdur. Buna səbəb son iki gün əzində ölkə ərazisinə cənub-qərb hava axınları vasitəsilə İran, İraq ərazisindən və Ərəbistan yarmadasından toz dumanının daxil olmasıdır. Tozlu hava şəraitinin gün ərzində müşahidə olunacağı ehtimal olunur. Axşam saatlarından başlayaraq cənub-qərb küləyinin şimal-qərb küləyi ilə əvəzlənməsi nəticəsində tozun miqdarı azalaraq norma həddinə düşəcək.
Bölmənin digər xəbərləri
