HEYDƏR ƏLİYEV - 1
Ölkəmizin tərəqqi və inkişafı yolundakı nailiyyətləri Ulu Öndər Heydər Əliyev ideyalarının təntənəsidir
![Ölkəmizin tərəqqi və inkişafı yolundakı nailiyyətləri Ulu Öndər Heydər Əliyev ideyalarının təntənəsidir](/files/2024/2/1200x630/17183639794643252556_1200x630.jpg)
Bakı, 14 iyun, AZƏRTAC
Azərbaycanda müstəqil dövlətçilik ənənələrinin formalaşdırılmasında Ümummilli Lider Heydər Əliyevin fədakar xidmətləri danılmazdır və bunu tarix də sübut edir. Azərbaycan xalqı Ulu Öndərin onun üçün etdiklərini heç zaman unutmur və unutmayacaq.
Bu fikriləri AZƏRTAC-a açıqlamasında Azərbaycan Şəhər Bələdiyyələri Milli Assosiasiyasının və Nərimanov bələdiyyəsinin sədri Təmraz Tağıyev söyləyib.
Bildirilib ki, tariximizə Milli Qurtuluş Günü kimi daxil olmuş 1993-cü ilin 15 iyun tarixi Azərbaycanın müstəqilliyi, inkişafı və gələcəyi yolunda müstəsna xidmətlər göstərmiş Heydər Əliyevin adı ilə bağlıdır. T.Tağıyev daim xalqına arxalanan və xalqa dayaq duran Ulu Öndərin böyüklüyü, onun Vətən sevgisi, Azərbaycan xalqının xoşbəxt gələcəyi naminə gördüyü böyük işləri xüsusi qeyd edib. Vurğulayıb ki, Ümummilli Lider Heydər Əliyev öz xilaskarlıq missiyası, müasir Azərbaycan dövlətinin təməlini qoyması ilə tarixdə və yaddaşlarda həmişə qalacaq.
Bir çox tarixi məqamlara toxunan Azərbaycan Şəhər Bələdiyyələri Milli Assosiasiyasının sədri deyib: “Ölkənin ali qanunverici orqanı xalqın arzu və istəklərini nəzərə alaraq Ulu Öndər Heydər Əliyevin hakimiyyətə qayıdışı gününü əbədiləşdirdi. Milli Məclisin 1997-ci il 27 iyun tarixli qərarında deyilirdi: "Azərbaycan xalqının azadlığının, müstəqil dövlətçiliyinin müqəddəratının həll edildiyi ən ağır günlərdə Heydər Əliyevin Azərbaycan xalqının iradəsinə tabe olaraq ölkə rəhbərliyinə qayıtması, əslində, onun müstəqil Azərbaycan Respublikasını, Azərbaycan xalqını, milli azadlıq hərəkatında qazanılmış tarixi nailiyyətləri məhv olmaqdan xilas etmək kimi çox çətin və şərəfli bir missiyanı könüllü olaraq öz üzərinə götürməsi idi. Bu, sözün əsl mənasında, "ömrümün qalan hissəsini də xalqıma qurban verirəm" deyib meydana atılan böyük ürəkli Vətən oğlunun öz xalqı, öz Vətəni qarşısında misilsiz fədakarlığı idi".
“Bu gün Azərbaycanda həqiqətən müstəqil dövlətçilik ənənələri formalaşdırılıb və bu tarixi uğurun əldə edilməsində Ümummilli Lider Heydər Əliyevin fədakar xidmətləri danılmazdır.
Ulu Öndər deyirdi ki, heç bir qüvvə bundan sonra Azərbaycanın müstəqilliyini əlindən ala, onun dövlətçiliyini məhv edə bilməz. Bu onu göstərir ki, nə qədər Azərbaycan var, Heydər Əliyev də olacaq, onun ideyaları daim yaşayacaq, bizi doğru yolla irəliyə aparacaqdır.
Ümummilli Liderin siyasi kursu bu gün Prezident, Yeni Azərbaycan Partiyasının Sədri İlham Əliyev tərəfindən böyük uğurla davam etdirilir. Ərazi bütövlüyünü bərpa etməklə Azərbaycan həm də dünyada söz sahibinə çevrilib. Hazırda ölkəmiz tərəqqi və inkişaf yolu ilə irəliləyir. Bu tərəqqi Ulu Öndər Heydər Əliyev ideyalarının təntənəsidir, Prezident İlham Əliyevin qayğı və diqqətinin təzahürüdür”, - deyə T.Tağıyev vurğulayıb.