ÖTƏN İL GÖYÇAY RAYONU ÜÇÜN SOSİAL-İQTİSADİ SAHƏDƏ UĞURLAR İLİ OLUB
Göyçay Rayon İcra Hakimiyyətinin başçısı Nazim İsmayılov müşavirədə hesabat məruzəsi ilə çıxış etmiş, müzakirələr olmuşdur. Göstərilmişdir ki, regionların sosial-iqtisadi inkişafı Dövlət Proqramından irəli gələn vəzifələrin, Prezident İlham Əliyevin bölgələrə, o cümlədən keçən il iyulun 7-də Göyçaya səfəri zamanı verdiyi tapşırıq və göstərişlərin həyata keçirilməsi sahəsində rayonda xeyli iş görülmüşdür. Əsas diqqət güclü sənaye potensialından daha səmərəli istifadə edilməsinə, aqrar sahənin inkişafına yönəldilməklə, əhalinin məşğulluğunun təmin olunmasına, habelə digər sosial problemlərin həlli yolu ilə insanların güzəranının yaxşılaşdırılmasına yönəldilmişdir.
Konserv zavodunun bazasında yaradılmış “Azplodeksport” MMC-nin Göyçay regional filialında beş milyard manatdan artıq yenidənqurma işləri aparılmış, nəticədə zavod güclü istehsal müəssisəsinə çevrilmişdir. Göyçay süd zavodunda artıq dünya bazarlarında rəqabət aparmaq qabiliyyətinə malik 26 adda məhsul istehsal edilir. Zavodun məhsulları MDB ölkələrinə, habelə Almaniyaya və İsrailə ixrac olunur. Türkiyə iş adamlarına məxsus “Kərpic-san ltd” MMC, şəhərin sənaye zonasında “ATF” MMC-nin vəsaiti hesabına inşa edilmiş, istehsal gücü saatda 45 ton olan müasir tipli asfalt zavodu, Cəyirli kəndi ərazisində illik məhsuldarlığı 0,8-1 milyon kubmetr olan daşdoğrayan qurğu, yerli iş adamlarının vəsaiti hesabına 2 yeni çınqıl-qum karxanası istifadəyə verilmişdir. Fəaliyyəti bərpa edilmiş Göyçay tikiş fabrikində 200 nəfərə yaxın fəhlə və qulluqçu öz əvvəlki iş yerlərinə bərpa edilmişdir. Hazırda fabrikdə ikinci tikiş sexinin işə salınması üçün hazırlıq gedir.
Sənaye potensialının gücləndirilməsi sahəsində görülmüş tədbirlər nəticəsində ötən il rayonda 25,9 milyard manatlıq sənaye məhsulu istehsal edilmişdir ki, bu da ondan əvvəlki ilə nisbətən 7,3 milyard manat və ya 39,2 faiz çoxdur.
Qeyd olunmuşdur ki, həyata keçirilən tədbirlər əhalinin məşğulluğunun təmin edilməsinə ciddi kömək göstərmişdir. 2005-ci ildə fəaliyyətdə olan obyektlərin genişləndirilməsi və yenidən qurulması, yeni istehsal sahələrinin açılması nəticəsində 1328 nəfər işlə, o cümlədən 677 nəfər daimi iş yeri ilə təmin edilmişdir. Bütövlükdə, Dövlət Proqramının həyata keçirilməsi ilə bağlı son iki ildə 3038 yeni iş yeri, o cümlədən 1785 daimi iş yeri yaradılmışdır.
Müşavirədə Göyçayda şəhərin su təchizatı, sel sularından mühafizəsi, bir sıra kənd yaşayış məntəqələrinin, əkin sahələrinin təsərrüfat suyu ilə təmin edilməsi sahəsində böyük layihələrin həyata keçirilməsi ilə bağlı görülən işlərdən də ətraflı danışıldı.
Rayonun iqtisadiyyatında aparıcı sahə olan aqrar sektorda qazanılan uğurlardan bəhs edilərək göstərildi ki, torpağın və əmlakın özəlləşdirilməsi kənddə sahibkarlığın inkişafına təkan vermiş, istehsal münasibətləri, sahənin idarə olunması qaydaları dəyişmişdir. Nəticədə həm mülkiyyətçilərin maraqları təmin edilmiş, həm də kənd təsərrüfatı məhsullarının istehsalı artmışdır.
Hesabat ilində təsərrüfatın əsas sahələrindən biri olan taxılçılıqda da yüksək nəticələr qazanılmışdır. 2005-ci ildə 11826 hektarda buğda, 4264 hektarda arpa biçilmiş, 41707 ton taxıl istehsal edilmişdir ki, bu da inişilkindən 1115 ton çoxdur.
Heyvandarlıq sahəsində də uğurlu nəticələrə nail olunmuşdur. Mal-qaranın sayı 421 baş artaraq 45646-ya, davarların sayı isə 2454 baş artaraq 56788-ə çatmışdır. İl ərzində pambıq və meyvə-tərəvəz məhsullarının istehsalı da xeyli artmışdır.
Məruzəçi və çıxış edənlər hesabat ilində aqrar sahənin daha da inkişaf etdirilməsi istiqamətində potensial imkanlardan heç də lazımınca istifadə olumadığını vurğulayaraq gələcəkdə pambıqçılığın, baramaçılığın, üzümçülüyün, qeyri-ənənəvi sahə olan kartofçuluğun inkişafı perspektivlərindən də danışmışlar.
Müşavirədə əhalinin elektrik enerjisi və təbii qazla təmin edilməsi sahəsində görülmüş işlərdən, təhsil, səhiyyə, mədəniyyət, rabitə, tikinti-quruculuq, abadlıq sahələrində həyata keçirilən tədbirlərdən, habelə bunlarla bağlı qarşıda duran təxirəsalınmaz vəzifələrdən ətraflı söhbət getmişdir.
Dövlət gənclər siyasətinin uğurlarından, bu sahədə rayonda ötən il görülmüş işlərdən, qaçqın və məcburi köçkünlərə göstərilən qayğıdan geniş bəhs edilmişdir.
Müşavirədə keçən il iyulun 7-də Prezident İlham Əliyevin Göyçayda rayon ictimaiyyəti ilə görüşündəki çıxışından sitat gətirildi: “Mən çox şadam ki, Göyçay çox sürətlə inkişaf edir, bu gün burada tanış olduğum müəssisələrin fəaliyyəti mənə çox gözəl təsir bağışladı. Mən çox sevinirəm ki, Göyçayda geniş quruculuq, abadlıq işləri gedir, yeni iş yerləri açılır, yeni müəssisələr istismara verilir. Şəhər abadlaşır, gözəlləşir, yeni parklar salınır, insanlara diqqət artır”.
Sitat səsləndiriləndən sonra vurğulandı ki, ölkə Prezidentinin verdiyi bu yüksək qiymət, eyni zamanda, hər bir göyçaylının üzərinə sosial-iqtisadi həyatda daha böyük uğurlar qazanmaqla ölkəmizin tərəqqisinə sanballı töhfələr vermək kimi böyük məsuliyyət də qoyur.
Müşavirədə Prezidentin İcra Aparatının şöbə müdiri Süleyman İsmayılov, Milli Məclisin elm və təhsil məsələləri daimi komissiyasının sədri Şəmsəddin Hacıyev çıxış etmişlər.
Müşavirə iştirakçıları adından Azərbaycan Prezidenti İlham Əliyevə müraciət qəbul edilmişdir.
Bölmənin digər xəbərləri
