Ötən il Masallıda sosial-iqtisadi inkişaf sahəsində uğurlu nəticələr qazanılmışdır
Masallı, 22 fevral (AZƏRTAC). Fevralın 21-də Masallı Şəhər Mədəniyyət Mərkəzində 2013-cü ildə rayonda sosial-iqtisadi inkişafın yekunlarına və 2014-cü ildə qarşıda duran vəzifələrə həsr olunmuş hesabat yığıncağı keçirilmişdir.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad etmiş, rayonda istehsal olunan kənd təsərrüfatı və sənaye məhsullarının Mərkəzin foyesində təşkil edilmiş sərgisi ilə tanış olmuş, 2013-cü ildə rayonun sosial-iqtisadi inkişafına həsr olunmuş sənədli filmə baxmışlar.
Rayon icra hakimiyyətinin başçısı Rafil Hüseynov hesabat məruzəsi ilə çıxış edərək demişdir ki, 2013-cü il Masallı rayonunda uğurlu il kimi yadda qalmışdır.
Ötən il sentyabrın 4-də Azərbaycan Prezidenti İlham Əliyevin Masallı rayonuna növbəti səfəri zamanı Heydər Əliyev Mərkəzinin, Nizami Gəncəvi adına Mədəniyyət Mərkəzinin, YAP Masallı rayon təşkilatının inzibati binasının, taekvondo və boks mərkəzlərinin açılışında iştirak etmiş, yenidən qurulan Heydər Əliyev Parkında, Heydər Əliyev Meydanında və Qəhrəmanlar Parkında görülən işlərlə tanış olmuşdur.
Dövlətimizin başçısının Sərəncamı ilə Masallı Tarix-Diyarşünaslıq Muzeyinin və Uşaq İncəsənət Məktəbinin tikintisi, rayonun sosial-iqtisadi inkişafının daha da sürətləndirilməsi və uzunluğu 23,8 kilometr olan kəndarası yolların çəkilməsi məqsədilə ümumilikdə 10,7 milyon manat vəsait ayrılmışdır. Bildirilmişdir ki, bütün bunlar dövlətimizin başçısının Masallı sakinlərinə olan diqqət və qayğısının bariz nümunəsidir.
Qeyd olunmuşdur ki, regionların sosial-iqtisadi inkişafına dair ikinci Dövlət Proqramında müəyyən edilmiş tədbirlərə müvafiq olaraq rayonunda nəzərdə tutulmuş bir sıra sosial-mədəni obyektlərin tikintisi davam etdirilir. Hesabat dövründə Masalı şəhərində Heydər Əliyev Mərkəzi yenidən qurulmuş, rayon icra hakimiyyətinin inzibati binasında əsaslı təmir, Zərifə Əliyeva, Azərbaycan, Füzuli, Dadva, Talışxanov və Qarabağ küçələrində geniş abadlıq və quruculuq işləri aparılmışdır. Bu dövrdə 6 məktəb binası, 1 uşaq bağçası və 2 həkim məntəqəsi istifadəyə verilmişdir. Hazırda mərkəzi rayon xəstəxanasının, Kalinovka kənd və Boradigah qəsəbə sahə xəstəxanalarının əsaslı təmiri, rayonun müxtəlif ərazilərində 6 həkim məntəqəsinin tikintisi aparılır. Bundan əlavə 3 məktəbin əsaslı təmiri, 5 məktəb və bir uşaq bağçasının, həmçinin Masallı Tarix Diyarşünaslıq Muzeyinin və Uşaq İncəsənət Məktəbinin tikintisi davam etdirilir.
Prezident İlham Əliyevin müvafiq Sərəncamı ilə ayrılmış vəsait hesabına rayonun Həsənli-Xırmandalı, Kürdəbaz-Qarğalıq, Seybətin-Səmidxan, Musaküçə-Lürən və Qodman-Qəriblər yollarının əsaslı təmiri başa çatdırılmışdır. Bununla yanaşı, 6 yaşayış məntəqəsini birləşdirən ümumi uzunluğu 14 kilometr olan Kolatan-Sığdaş və ümumi uzunluğu 4 kilometr olan Bambaşı-Yeyənkənd yolunun çəkilişi başa çatdırılmışdır.
Diqqətə çatdırılmışdır ki, ötən il rayon üzrə məhsul istehsalı və göstərilən xidmətlərin həcmi 3,9 faiz artaraq 439 milyon manat olmuşdur. Hesabat dövründə adambaşına düşən pul gəlirləri 2072 manat, bir işçiyə hesablanmış orta aylıq əmək haqqı 261,2 manat təşkil etmişdir.
Bu dövrdə rayonda 439 milyon manatlıq məhsul istehsal edilmişdir ki, bu da əvvəlki illə müqayisədə 2,4 faiz çoxdur. Rayonda sənaye məhsullarının həcmi 6,8, kənd təsərrüfatı məhsullarının həcmi 0,7, əhaliyə göstərilən xidmətlərin həcmi 1,7, orta aylıq əmək haqqı 1,6 faiz artmışdır.
2013-cü ildə Masallıda 24 min 953 hektar əkin sahəsindən 17 min 536 hektarında əkin aparılmışdır. Kənd təsərrüfatı məhsullarının istehsalının həcmi əvvəlki illə müqayisədə 0,7, heyvandarlıq məhsullarının istehsalı 10,6, bitkiçilik məhsullarının istehsalı 11,90 faiz artmışdır.
Rayonda əkilmiş 7 min 604 hektar buğda sahəsindən 17 min 895 ton, 2 min 430 hektar arpa sahəsindən 5 min 282 ton, 2805,7 hektar tərəvəz sahəsindən 70 min 299 ton, 1477 hektar kartof sahəsindən 32 min 175 ton, 586,5 hektar bostan əkini sahəsindən isə 6 min 909 ton məhsul istehsal edilmişdir.
Bu dövrdə rayonda iri buynuzlu mal-qaranın baş sayı 73 min 664 başa, davarların baş sayı 83 min 098 başa, süd istehsalı 48 min 570 tona, ət istehsalı 5 min 678 tona, yumurta istehsalı 55 min 200 ədədə çatdırılmışdır.
Yığıncaqda çıxış edənlər 2013-cü ildə rayonda sosial-iqtisadi inkişaf sahəsində görülmüş işlərdən danışmış, təkliflər səsləndirmişlər.
Geniş şura iclasında müzakirə edilən məsələ ilə bağlı müvafiq qərar qəbul olunmuşdur.
Ötən il rayonun ictimai-siyasi həyatında fərqlənən bir qrup insana fəxri-fərmanlar və mükafatlar təqdim edilmişdir.
Toplantıda Azərbaycan Respublikası Prezidenti Administrasiyasının məsul işçisi Vəfadar Bağırov, Milli Məclisin deputatları Elmira Axundova, Nəriman Əliyev və Fəzail İbrahimli iştirak etmişlər.
Yığıncaq iştirakçıları adından Prezident İlham Əliyevə müraciət qəbul olunmuşdur.
Bölmənin digər xəbərləri
