PANKRATİON ÜZRƏ AZƏRBAYCAN ÇEMPİONATI BAŞLANMIŞDIR
Bakı, 10 aprel (AZƏRTAC). Aprelin 10-da “Start” idman və əyləncə mərkəzində pankration üzrə kişi və qadınlar arasında ikinci Azərbaycan çempionatı başlamışdır.
İki gün davam edəcək yarışda 22 çəki dərəcəsi üzrə 210 idmançı mübarizə aparır. Yarışın qalibləri iyunun sonunda Bakıda keçiriləcək Dünya kuboku turnirində iştirak etmək hüququ qazanacaqlar.
Çempionatın rəsmi açılış mərasimində Azərbaycan Pankration Federasiyasının prezidenti Azad Əsgərov bildirmişdir ki, son zamanlar ölkə pankrationçuları beynəlxalq arenada yüksək nailiyyətlərə imza atırlar. Dövlətin diqqət və qayğısı , Gənclər və İdman Nazirliyinin dəstəyi bu uğurlarda mühüm rol oynamışdır. Ümumiyyətlə, son illər beynəlxalq yarışlarda Azərbaycan idmançılarının qazandıqları qələbələr dövlətimizin bu sahəyə göstərdiyi diqqət və qayğısının bəhrəsidir. Ölkə Prezidenti, Milli Olimpiya Komitəsinin rəhbəri İlham Əliyevin “Azərbaycan artıq bütün dünyada idman ölkəsi kimi tanınır” kəlamı idmançılarımızın fəaliyyətinə verilən ən yüksək qiymətdir.
Azərbaycan Respublikasının dövlət himni səsləndirildikdən sonra çempionat açıq elan olunmuşdur.
######
Bölmənin digər xəbərləri
