“PLANETİMİZİN BÜTÜN DÖVRLƏRDƏ ƏN GÖRKƏMLİ ŞƏXSİYYƏTİ”
Burada müəllifin ayrı-ayrı illərdə ulu öndərimiz haqqında yazdığı məqalələr toplanmışdır. Bu məqalələrdə dahi rəhbərimiz Heydər Əliyevin Azərbaycanın müstəqilliyi, xalqımız üçün, Azərbaycan dövlətçiliyi üçün gördüyü işlərdən, Azərbaycanın beynəlxalq aləmdə uğurlar qazanmasında, dünya dövlətləri sırasında öz yerini tutmasında oynadığı roldan bəhs edilir.
“Planetimizin bütün dövrlərdə ən görkəmli şəxsiyyəti”. Heydər Əliyevin Azərbaycan üçün gördüyü ümman miqyaslı işlərin kiçik bir damlasının yığcam formada əks etdirilməsinə həsr olunan bu kitabın belə adlandırılmasını, əlbəttə, onun məzmunu şərtləndirir. Kitabın müəllifinə məxsus olan bu ifadə Heydər Əliyevin fəaliyyətinin dəyərləndirilməsinə həsr olunmuş bütün çoxsaylı məqalələrin, çıxışların, kitabların yekunudur, reallıqdan irəli gələn nəticədir. Heydər Əliyev dünyasının qiymətini bunca əhatəli, bunca dəqiq, bunca sərrast verə biləcək başqa ifadə yoxdur və indiyə qədər işlədilməmişdir.
Kitaba daxil edilmiş məqalələrdə ümummilli liderimizin Azərbaycan siyasi rəhbərliyinə qayıdışından bəhs olunarkən xüsusi qeyd edilir ki, şəraitlə bağlı tarixin yetişdirdiyi digər görkəmli şəxslərdən fərqli olaraq, Heydər Əliyev tarixin - öz ölkəsinin tarixinin yaradıcısıdır. Bəli, Heydər Əliyev müasir Azərbaycan tarixinin yaradıcısıdır. Yaşadıqları zaman və məkandan asılı olaraq, dövlət başçılarının bir qismi zor gücünə, digər bir qismi sivil yolla - böyük güc və qüvvə ilə apardıqları çoxillik mübarizə nəticəsində hakimiyyətə gəlmişlərsə, Heydər Əliyevin siyasi hakimiyyət zirvəsinə yenidən yüksəlməsinə ideyaca əks qütbdə qərarlaşmış və bir zamanlar Heydər Əliyevin Bakıda olmasından belə narahatlıq keçirən iqtidar özü çıxılmaz vəziyyətdə qaldığından, yalvarışlı xahişlərlə rəvac vermişdir. Heydər Əliyev sivil qaydaların hökm sürdüyü dövlətə deyil, müstəqilliyinin itirilməsi, torpaqlarının parçalanması, dövlətçiliyinin məhv edilməsi məqamlarını yaşayan, tənəzzüldə olan, hərc-mərcliyin baş alıb getdiyi, cinayətkar dəstələrin tüğyan etdiyi bir ölkəyə rəhbərlik etməyə başlamış və onu çox qısa bir müddətdə sivil dövlətlər sırasına çıxarmışdır. Əgər digər görkəmli insanlar mənsub olduqları ölkəyə görə tanınırdılarsa, Heydər Əliyevə görə Azərbaycan, onun sərvətləri tanınmış və bu ölkəyə xüsusi diqqətlə yanaşılmışdır. Dövlət başçılarının əksəriyyəti ölkələrini kifayət qədər şöhrətləndirsələr də, sonda onu iflic vəziyyətə salanlar da az deyildir. Heydər Əliyev isə Azərbaycan estafetini bütün sahələr üzrə yüksəlişdə olan vəziyyətdə vermiş və qazanılmış uğurlar bu gün də müvəffəqiyyətlə davam etdirilir. Heydər Əliyev Azərbaycana müstəqillik, azərbaycanlılara azadlıq bəxş etmiş, ölkəmizdə insanların xoşbəxt və firavan yaşamaları üçün mümkün ola bilən hər şeyi etmişdir.
Müəllif yazır ki, dünyada insan üçün azadlıqdan, dövlət üçün müstəqillikdən böyük nemət yoxdur. Əgər azad insan müstəqil dövlətdə yaşayırsa, bu, dəyəri ölçüyəgəlməz bir xoşbəxtlikdir. Azərbaycan xalqı üçün Azərbaycanda xoşbəxtliyin belə yüksək zirvəsinin fəthi ümummilli liderimiz Heydər Əliyevin adı ilə bağlıdır. Bəli, planetimizin bütün dövrlərdə ən görkəmli şəxsiyyəti olan dahi rəhbərimiz Heydər Əliyev fəaliyyətinin hər bir məqamı ilə xalqın, dövlətin, cəmiyyətin və onun üzvlərinin mənafeyinə xidmət etmiş, Azərbaycan xalqının, Azərbaycan torpağının, Azərbaycan dövlətinin bütövlüyü uğrunda fədakarlıqla çalışmış, müstəqilliyimizin möhkəmlənməsi, dövlətçiliyimizin inkişafı, xalqımızın rifahının yaxşılaşması, demokratiyanın inkişafı, respublikamızın qüdrətlənməsi və ölkəmizin beynəlxalq nüfuzunun daha da artması üçün mümkün ola bilən hər şeyi etmişdir.
Kitab belə bir epiloqla sona yetir:
“Heydər Əliyev azərbaycanlı olduğu üçün özünü xoşbəxt sanırdı. Azərbaycan xalqı da bütün dünyanın qibtə edəcəyi Heydər Əliyev kimi Prezidenti olduğu üçün xoşbəxt idi. İndi də ona görə xoşbəxtdir ki, əsası Heydər Əliyev tərəfindən qoyulan bu xoşbəxtliyə Heydər Əliyev idarəçilik məktəbinin layiqli davamçısı, möhtərəm Prezidentimiz cənab İlham Əliyev möhkəm və sarsılmaz təminat yaratmışdır”.
Bölmənin digər xəbərləri
