PLANETİN MÜXTƏLİF YERLƏRİNDƏ HAVA ŞƏRAİTİ DƏYİŞİR

17.12.2005 [19:22]
Çap et
A⁺ A^-

AZƏRTAC xarici KİV-lərə istinadla xəbər verir ki, Çexiya Respublikasında qasırğa baş vermişdir. Ölkənin mərkəzi hissəsində güclü külək qar və leysan yağışları ilə müşayiət olunmuşdur. Təbii fəlakət sürücülər üçün xeyli problem yaratmışdır. Dağ rayonlarında onlarca avtomobil yolu bağlanmışdır.

Çexiya paytaxtında Praqa qradı – Çexiya Respublikası Prezidentinin iqamətgahı bağlanmışdır. Dövlət başçısı aparatının nümayəndələri güclü küləyin qədim sarayın və Müqəddəs Vita məbədinin damını uçuracağından ehtiyat edirlər.

Kanadanın Ontario və Kvebek əyalətlərində qar çovğunı tüğyan edir. Çoxlu qar yağması nəticəsində Ottavada və Monrealda yollar bağlanmış, qartəmizləyən maşınlar hətta əsas yolları təmizləyə bilmir. Güclü külək vəziyyəti daha da ağırlaşdırır. Ottavada sərnişin nəqliyyatı demək olar ki, sıradan çıxmışdır. Şəhər hava limanında reyslərin əksəriyyəti təxirə salınmışdır.

Yaponiyanın bir sıra rayonlarında dekabr üçün rekord səviyyədə qar yağmışdır. Yapon dənizi sahillərində bu mövsümdə temperatur həmişəkindən xeyli aşağıdır. Meteorologiya İdarəsinin məlumatına görə, dekabrın 18-dək ayrı-ayrı rayonlarda qar örtüyünün qalınlığı 70-80 santimetrə çatacaqdır.

Qar yağması ilə əlaqədar ölkədə azı 5 nəfər həlak olmuşdur. Hava və dəmir yol nəqliyyatının hərəkəti məhdudlaşdırılmışdır.