POLİS AKADEMİYASINDA NÖVBƏTİ BURAXILIŞ MƏRASİMİ KEÇİRİLMİŞDİR
Əvvəlcə ümummilli lider Heydər Əliyevin, respublikamızın suverenliyi və ərazi bütövlüyü uğrunda mübarizədə şəhid, xidməti tapşırıqlarını yerinə yetirərkən həlak olan polis əməkdaşlarının xatirəsi bir dəqiqəlik sükutla yad edilmişdir. Azərbaycan Respublikasının Dövlət himni səslənmişdir. Daxili işlər naziri, general-polkovnik Ramil Usubov, akademiyanın indiki, keçmiş rəisləri polis-polkovniki Ramiz Nağıyev, general-mayor Rəsul Rəsulov, polis veteranları və digər şəxslər təntənəli marşla keçən müdavimləri salamlamışlar.
Akademiyanın rəisi, polis-polkovniki Ramiz Nağıyev məzunları təbrik edərək bildirmişdir ki, 163 nəfər əyani şöbədə təhsilini başa vuraraq hüquqşünas ixtisası üzrə diplom və daxili işlər nazirinin əmri ilə polis leytenantı rütbəsi almışdır. Onlardan beş nəfər fərqlənmə diplomuna layiq görülmüşdür. Təhsildə, eləcə də nizam-intizamı ilə daha çox fərqlənən məzunlardan üçünə polis baş leytenantı rütbəsi verilmişdir. Bu il akademiyanı həm də Xüsusi Dövlət Mühafizə Xidmətinin bir əməkdaşı, Gürcüstanın 3, Dağıstanın isə 2 vətəndaşı bitirmişdir. 232 məzuna qiyabi təhsil alması barədə diplom verilmişdir. O demişdir ki, vaxtilə ümummilli lider Heydər Əliyevin, indi isə Prezident İlham Əliyevin qayğı və diqqəti sayəsində Polis Akademiyası qısa müddət ərzində böyük inkişaf yolu keçmiş, ölkənin nüfuzlu ali təhsil müəssisələrindən birinə çevrilmişdir. Şəxsi heyət ümummilli liderimizin dövlətçilik ənənələrinin layiqli davamçısı Prezident İlham Əliyevin hüquq mühafizə orqanlarına tələbkarlığı ilə yanaşı, qayğı və diqqətini də rəğbətlə qarşılayır və ona cavab olaraq öz vəzifə borclarını yerinə yetirməyə daha məsuliyyətlə yanaşır. Bu gün “Azərbaycan Respublikasında polis orqanlarının fəaliyyətinin təkmilləşdirilməsinə dair Dövlət Proqramı”na uyğun olaraq, müasir tələblərə müvafiq surətdə təchizatın güclənməsi, şəxsi heyətin xidmət şəraitinin, sosial müdafiəsinin yaxşılaşdırılması müvəffəqiyyətlə həyata keçirilir.
Akademiyanın rəisi yüksək səviyyəli təhsil üçün yaradılmış şərait barədə də danışaraq qeyd etmişdir ki, qarşımıza qoyulmuş vəzifələrin icrası üçün hər cür imkan vardır. Daxili işlər nazirinin qayğısı, gündəlik tələbi, nəzarəti ilə akademiyanın maddi-texniki bazası təkmilləşir. Yeni tədris, yataqxana, yeməkxana korpusları şəxsi heyətin istifadəsinə verilmişdır.
Akademiyanı fərqlənmə diplomu ilə bitirmiş məzun Emil Mehdiyev bu təhsil ocağında yaradılan şəraitdən, verilən bilikdən danışmışdır. O demişdir ki, göstərilən etimadı doğruldacaq, Vətənə, dövlətə, xalqımıza vicdanla xidmət edəcəyik. Professor-müəllim heyətinin səyi ilə aldığımız biliklər çətin, lakin şərəfli fəaliyyətimizdə bizə yardımçı olacaqdır. Daxili işlər orqanlarında xidmətimiz dövründə yüksək peşəkarlıqla işləyəcək, göstərilən etimadı doğruldacağıq.
Daxili işlər naziri, general-polkovnik Ramil Usubov məzunları və mərasim iştirakçılarını təbrik etmiş, onlara ölkəmizin Prezidenti, Silahlı Qüvvələrin Ali baş komandanı İlham Əliyevin təbrikini və xoş arzularını çatdırmışdır.
Nazir vurğulamışdır ki, daxili işlər orqanlarının şəxsi heyətinin, o cümlədən zabit heyətinin hazırlanmasında Polis Akademiyasının xüsusi yeri var. 85 illik tarix ərzində Azərbaycan polisində yüksək ixtisaslı kadrların hazırlanmasında məhz bu təhsil ocağı böyük rol oynamışdır. Azərbaycan müstəqillik qazandıqdan sonra bu akademiya xüsusilə böyük inkişaf yolu keçmişdir. Ulu öndər Heydər Əliyevin Azərbaycana ikinci dəfə hakimiyyətə qayıdışı həyatımızın bütün sahələrində tərəqqiyə səbəb olduğu kimi, daxili işlər orqanlarında, onun bütün strukturlarında da sürətli inkişaf baş vermişdir. Son illər Polis Akademiyası tanınmaz dərəcədə dəyişmişdir. Burada nəinki şərait yaxşılaşmış, həm də tədrisin keyfiyyəti yüksəlmişdir.
Ramil Usubov müstəqillik illərində Azərbaycan polisinin şərəfli yol keçdiyini, onun formalaşmasında ulu öndərimiz Heydər Əliyevin misilsiz xidmətlərinin olduğunu söyləmişdir. Ümummilli liderimizin siyasi xəttini uğurla davam etdirən Prezident İlham Əliyev daxili işlər orqanlarının maddi-texniki bazasının möhkəmlənməsinə, yüksək ixtisaslı kadrlarla təmin olunmasına böyük diqqət göstərir.
Ölkəmizdə möhkəm ictimai-siyasi sabitliyin hökm sürdüyünü xatırladan nazir bu işdə polisin də xidmətinin az olmadığını söyləyərək bildirmişdir ki, indi zabit rütbəsi alan gənclər bu işə öz töhfələrini verəcəklər. O, əmin olduğunu bildirmişdir ki, Azərbaycanın daxili işlər orqanlarının şəxsi heyəti silahlı qüvvələrimizin Ali baş komandanının apardığı siyasi kursa daim sadiq qalacaqdır.
Daxili işlər naziri məzunlara diplomlar və zabit poqonları təqdim etmişdir. Sonra xatirə kötüyünə lövhə vurulmuşdur.
Tədbirdə Prezidentin İcra Aparatının xarici əlaqələr şöbəsinin müdiri Novruz Məmmədov iştirak etmişdir.
Bölmənin digər xəbərləri
