Politoloq: Azərbaycan xalqının Prezidentinə yüksək etimadı ölkənin əldə etdiyi tarixi uğurların məntiqi nəticəsidir
Bakı, 3 iyul, AZƏRTAC
Son ictimai rəy sorğularının nəticələri bir daha göstərir ki, Azərbaycan cəmiyyətində Prezident İlham Əliyevə yüksək etimad və inam mövcuddur. Sorğunun nəticələrinə əsasən, respondentlərin 87,7 faizi Prezident İlham Əliyevə etimad göstərdiyini, 93,6 faizi dövlətimizin başçısının fəaliyyətini müsbət qiymətləndirdiyini, 81,9 faizi isə onu alternativsiz siyasi lider hesab etdiyini bildirib.
Bu fikirləri AZƏRTAC-a açıqlamasında politoloq Elşad Həsənov səsləndirib.
Onun sözlərinə görə, ictimai rəy sorğusunda əksini tapan göstəricilər təsadüfi deyil və Azərbaycanın son illərdə qazandığı siyasi, iqtisadi, hərbi və diplomatik uğurların, ölkənin ərazi bütövlüyünün və dövlət suverenliyinin tam bərpa edilməsinin, daxili sabitliyin təmin olunmasının, eləcə də müstəqil xarici siyasət kursunun məntiqi nəticəsidir.
“Prezident İlham Əliyev 2003-cü ildə dövlət başçısı seçildiyi vaxtdan etibarən həyata keçirdiyi uzaqgörən və məqsədyönlü siyasətlə ölkənin hərtərəfli inkişafını təmin edib. Bu illər ərzində iqtisadiyyat gücləndirildi, kadr potensialının inkişafına xüsusi diqqət yetirildi, dövlət gəlirləri təhsil sisteminin inkişafına, iqtisadiyyatın möhkəmləndirilməsinə, müdafiə qabiliyyətinin artırılmasına və təhlükəsizliyin təmin olunmasına yönəldildi. Azərbaycanın iqtisadi imkanlarının genişlənməsi ölkənin bütün sahələr üzrə inkişafına mühüm təkan verdi. Prezident İlham Əliyevin rəhbərliyi ilə Azərbaycan Ordusu müasir dövrün çağırışlarına uyğun şəkildə formalaşdırılıb, döyüş hazırlığı artırılıb, Silahlı Qüvvələr ən müasir silah və hərbi texnika ilə təmin olunub, şəxsi heyətin peşəkarlığının yüksəldilməsi istiqamətində ardıcıl islahatlar həyata keçirilib. Azərbaycan müstəqil daxili və xarici siyasət yürüdərək öz milli maraqlarını qətiyyətlə müdafiə etdi. Bunun nəticəsində 44 günlük Vətən müharibəsində tarixi Zəfər qazanıldı, Ermənistanın işğalçı silahlı qüvvələri darmadağın edildi, ölkəmizin ərazi bütövlüyü bərpa olundu. Daha sonra həyata keçirilən lokal xarakterli antiterror tədbirləri nəticəsində dövlətimizin suverenliyi tam təmin edildi", - deyə Elşad Həsənov bildirib.
Politoloq bildirib ki, Azərbaycanın hərbi Qələbəsi regionda yeni geosiyasi reallıqlar formalaşdırdı. Diqqət çəkən əsas məqamlardan biri də ondan ibarətdir ki, Azərbaycan müharibədə qalib gəlməsinə baxmayaraq, regionda davamlı sülhün tərəfdarı kimi çıxış etdi. Məhz Azərbaycan sülh təşəbbüsü ilə çıxış edən tərəf oldu və Ermənistanla münasibətlərin beynəlxalq hüququn norma və prinsipləri əsasında normallaşdırılmasını təklif etdi. Prezident İlham Əliyevin həyata keçirdiyi prinsipial və ardıcıl siyasət nəticəsində Ermənistan da Azərbaycanın ərazi bütövlüyünü və suverenliyini tanıdığını bəyan etdi. İşğaldan azad edilmiş Qarabağ və Şərqi Zəngəzur iqtisadi rayonlarında genişmiqyaslı bərpa və yenidənqurma proqramları uğurla həyata keçirilir. Bu günə qədər həmin ərazilərin bərpasına 17 milyard ABŞ dollarından artıq vəsait yönəldilib. Artıq 90 mindən çox insan doğma yurdlarına qayıdaraq həmin ərazilərdə yaşayır və çalışır. Yeni yaşayış məntəqələri, yollar, hava limanları, məktəblər, xəstəxanalar, sənaye və kənd təsərrüfatı infrastrukturu yaradılır. Ağıllı kənd və ağıllı şəhər layihələri uğurla həyata keçirilir.
Elşad Həsənovun sözlərinə görə, Prezident İlham Əliyevin xarici dövlət və hökumət başçılarını, beynəlxalq təşkilatların rəhbərlərini Şuşada, Xankəndidə və işğaldan azad olunmuş digər ərazilərdə qəbul etməsi Azərbaycanın əldə etdiyi uğurların və aparılan quruculuq işlərinin beynəlxalq ictimaiyyətə nümayiş etdirilməsi baxımından mühüm əhəmiyyət daşıyır. Dövlətimizin başçısı gecə-gündüz çalışır ki, Qarabağ və Şərqi Zəngəzur ölkəmizin ən inkişaf etmiş bölgələrindən birinə çevrilsin. Bununla yanaşı, Azərbaycanın digər şəhər və rayonlarının sosial-iqtisadi inkişafı da daim diqqət mərkəzində saxlanılır.
Müxbir - Səbinə Əlizadə
Bölmənin digər xəbərləri
