Polşa şərq sərhədləri boyunca hava nəqliyyatına məhdudiyyətlər qoyub
Bakı, 11 sentyabr, AZƏRTAC
NATO-ya üzv dövlətin hava məkanına çoxsaylı pilotsuz uçuş aparatının daxil olmasından sonra artan gərginlik fonunda Polşa Belarus və Ukrayna ilə şərq sərhədləri boyunca hava nəqliyyatına məhdudiyyətlər qoyub.
AZƏRTAC xəbər verir ki, bu barədə Polşa Silahlı Qüvvələrinin Əməliyyat komandanlığı məlumat yayıb.
Çərşənbə günü səhər saatlarında Polşa NATO müttəfiqlərinin dəstəyi ilə öz hava məkanında Rusiyaya aid pilotsuz uçuş aparatlarını vurub. “Reuters” xəbər verir ki, bu, Rusiya-Ukrayna müharibəsi zamanı Qərb hərbi alyansı üzvünün atəş açması ilə bağlı ilk məlum hadisədir.
Xəbərdə deyilir ki, məhdudiyyətlər dekabrın 9-dək qüvvədə olacaq.
Agentlik bildirib ki, uçuş planına uyğun fəaliyyət göstərən, müvafiq transponderlərlə təchiz edilmiş və aviasiya orqanları ilə ikitərəfli əlaqə saxlayan pilotlu təyyarələr istisna olmaqla, qadağa zonasında uçuşlar günəş çıxandan gün batana kimi qadağandır.
Məhdudiyyətlər hərbi uçuşlar və bəzi əlavə xüsusi uçuşlar, habelə çağırış işarələri üçün də istisnalarla həyata keçiriləcək.
Bölmənin digər xəbərləri
