Bakı, 8 aprel, AZƏRTAC

Qürur, sevinc, inam... Bu hisslər Prezident və Ali Baş Komandan İlham Əliyevə ünvanlanan çoxsaylı məktubların hər birindən qırmızı xətt kimi keçir. Milli Ordumuzun uğurlu döyüş əməliyyatları uşaqdan böyüyədək hamıda böyük ruh yüksəkliyi yaradıb, insanların qələbə əzmini artırıb. Məktub və müraciət müəllifləri Prezidentə inandıqlarını, böyük qələbə naminə əllərindən gələni etməyə hazır olduqlarını yazırlar. Məktəbli və universitet tələbəsi də, keçmiş Qarabağ döyüşçüsü və veteran da, ehtiyatda olan zabit və Vətəndən uzaqda yaşayan soydaşımız da əmrə müntəzirdir. Xalqımız öz liderinin ətrafında yumruq kimi birləşib, qələbə əzmi, Vətən təəssübkeşliyi görünməmiş dərəcədə güclənib. Prezidentə ünvanlanan yüzlərlə məktub və müraciət bunun əyani təsdiqidir.

AZƏRTAC Prezidentin saytına istinadla Ali Baş Komandan İlham Əliyevə ünvanlanan bir sıra məktub və müraciətləri təqdim edir.

Vətəni qorumaq namus və şərəf borcumuzdur

Sumqayıt sakini peşəkar zabit Ceyhun Mehdiyev Prezidentə müraciətində yazır: “Sizin uğurlu siyasətiniz və son günlər cəbhə xəttində Silahlı Qüvvələrimizin qalibiyyəti hər kəsdə tezliklə doğma torpaqlarımıza qayıdacağımıza əminliyi daha da artırıb.

Möhtərəm Prezident, mən ehtiyatda olan zabitəm. Türkiyədə 5 il ali hərbi təhsil almışam, xidmətimin 4 ilini Füzuli istiqamətində ön cəbhədə keçmişəm. O yerləri ovuc içi kimi tanıyıram. Məni bu dövlət bu günlər üçün oxutdurub, indi peşəkar zabit kimi kənarda qalmaq mənim üçün çox ağırdır. Cənab Prezident, mən Vətən torpağı naminə döyüşmək, əsgərlərimizə təlim keçmək, düşməni torpaqlarımızdan qovub çıxarmaq arzusundayam. Peşəkar zabit olaraq bu, mənim namus və şərəf borcumdur. Əmr verin, cəbhəyə yollanım”.

Əfqanıstan müharibəsi veteranları da Ali Baş Komandana məktub ünvanlayaraq Qarabağ uğrunda döyüşlərdə iştirak etmək istədiklərini bildirirlər. Azərbaycan Əfqanıstan Veteranları İctimai Birliyinin Quba rayon filialının sədri Elmar Məlikov Ordumuzla və Prezidentimizlə qürur duyduğunu bildirərək yazır: “Cənab Ali Baş Komandan, döyüş təcrübəsi olan zabit və əsgərlərimiz hər zaman Sizinlədir. Biz Sizə inanır və güvənirik. Siz də bizə güvənə bilərsiniz. Yaşımızın 50-ni haqlamasına baxmayaraq, Qarabağımızı erməni işğalçılarından təmizləməyə, onları Ermənistanın paytaxtına kimi qovmağa yetəcək qədər enerjimiz var. Əmrinizi gözləyirik”.

Vətəndən uzaqda, Rusiyanın Tver şəhərində yaşayan ehtiyatda olan hərbi qulluqçu İxtiyar Əkbərov hərbi xidmətini bir neçə gün əvvəl Milli Ordumuz tərəfindən azad edilən Lələtəpə yüksəkliyinin yaxınlığında keçdiyini bildirir. Ordumuzun bu yüksəkliyi azad etməsindən qürur duyduğunu vurğulayır: “Cənab Prezident, rəşadətli Azərbaycan Ordusunun Ali Baş Komandanı, Sizin kimi böyük şəxsiyyətin başçılıq etdiyi xalqıma və Orduma görə keçirdiyim sevinc və qürur hisslərimi gizlədə bilmirəm. Siz həm xarici, həm də daxili siyasətinizlə bütün dünyaya sübut etdiniz ki, Azərbaycan kiçik ölkə deyil, çoxəsrlik tarixi və zəngin ənənələri olan dövlətdir”. Azərbaycanlı olduğu ilə, öz Prezidenti ilə fəxr etdiyini bildirən İxtiyar daha sonra yazır ki, hər an bütün işlərini atıb Bakıya gəlməyə, torpaqlarımızı düşməndən tam təmizləmək üçün silaha sarılmağa hazırdır.

Ali Baş Komandanımızla, Ordumuzla fəxr edirik

“Cənab Ali Baş Komandan, biz həmişə inanmışıq, indi də inanırıq ki, erməni işğalçıları tərəfindən zəbt edilmiş Dağlıq Qarabağ və digər torpaqlarımız Sizin rəhbərliyiniz, apardığınız daxili və xarici siyasət, Ordumuzun gücü sayəsində yaxın gələcəkdə azad olunacaq. İnşallah, Azərbaycan bayrağı Xankəndi və Şuşa şəhərlərində dalğalanacaq. Biz Azərbaycandan uzaqda yaşasaq da, Vətənimizdə baş verən davamlı inkişafı daim izləyir və Sizi hər zaman dəstəkləyirik”. Bu sətirlər digər soydaşımız Mirsadiq Musəvinin məktubunda yer alır. O, Prezidentə Ordumuzun qələbələrinə sevinən, əsgərlərimizlə qürur duyan Norveçdəki azərbaycanlıların ürək sözlərini çatdırır.

Hazırda Livanın Beyrut şəhərində yaşayan Yeni Azərbaycan Partiyasının üzvü İrina Çerçintseva-Beaino da son günlər cəbhədə baş verən döyüşlərdə Azərbaycan Ordusunun qələbəsinə ürəkdən sevindiyini deyir. O, Livanda yaşayan Azərbaycan vətəndaşlarının ürəklərinin Prezidentimizlə, Vətənimizlə döyündüyünü, qələbəyə inandıqlarını vurğulayır: “Qarabağ dedikdə hər kəs müxtəlif hisslər keçirir. Kimi kədərlənir, kimi isə uşaqlığını və gəncliyini xatırlayır. Bu gün bizim Xankəndi, Ağdam, Füzuli, Kəlbəcər, Laçın, eləcə də bir sıra digər şəhər və rayonlarımız, Qarabağın tacı Şuşamız işğal altındadır. İnanırıq ki, gün gələcək Azərbaycan bayrağı Xankəndidə və Şuşada dalğalanacaq. Allah bütün hərbiçilərimizin və cəbhə bölgəsində yaşayan həmvətənlərimizin köməyi olsun. Biz Sizinlə fəxr edirik, cənab Prezident. Tanrı Sizi qorusun”.

Prezidentə eyni ruhlu digər müraciət Rusiyanın Dolqoprudnı şəhərində yaşayan həmyerlimiz Samir Sultanov tərəfindən ünvanlanıb: “Sizin əzminiz və xalqımın səyləri sayəsində ölkəmiz böyük nailiyyətlər əldə edib. İcazə verin, Rusiyada tanıdığım, mənimlə həmfikir olan bütün azərbaycanlılar adından Sizə təşəkkür edim. Ordumuzun bu möhtəşəm qələbəsinə görə Sizə minnətdarlığımı və dəstəyimi ifadə etmək istəyirəm. Biz həmişə Sizinləyik. Bu ədalətli və müqəddəs müharibədə Allahdan Sizə qələbə arzulayıram. Azərbaycana eşq olsun! Rəşadətli Azərbaycan Ordusuna eşq olsun! Əsgərlərimiz döyüşə qələbə əzmi ilə gedirlər. Onlar ölümün gözünə dik baxırlar, çünki düşmənlərdən fərqli olaraq, onlar şəhidlik zirvəsinə ucalırlar. Bu torpaqlar bizim olub, bizimdir və bizim olacaq".

Vətəninə, xalqına və Prezidentinə xidmət etməyə həmişə hazır olanlar sırasında Ukraynanın Kiyev şəhərində yaşayan həmyerlimiz Asif Əliyev də var. Ukrayna saytlarından birinin redaktoru olan soydaşımız Prezidentə müraciətlə yazır: “Azərbaycana başçılıq etdiyiniz müddət ərzində, eləcə də Qarabağda münaqişənin eskalasiyası dövründə ölçülüb-biçilmiş və müdrik siyasətinizə görə Sizə minnətdarlığımı bildirmək istəyirəm. Fəxr edirəm ki, tarixi Vətənimin qüdrətli Ordusu və Azərbaycan xalqının dəstəklədiyi Prezidenti var. Bu xidmətlərinizə görə Sizə səmimi təşəkkürümü bildirmək və bəyan etmək istəyirəm ki, Azərbaycanın suverenliyinin bərpası və müstəqilliyinin möhkəmlənməsi işinə öz töhfəmi verməyə daim hazıram. Vətənimə, xalqıma və Azərbaycan Prezidentinə xidmət etməyə həmişə hazıram. Çalışıram ki, Ukrayna xalqına Azərbaycan həqiqətlərini çatdırım. Dövlətimizə az da olsa köməyim dəysə, buna çox şad olardım”.

İlk qələbə sevincinə görə Sizə minnətdarıq

Azərbaycan Prezidentinə ölkəmizin müxtəlif bölgələrindən müraciət və məktub ünvanlayan insanlar böyük qələbənin yaxında olduğuna inanır, Ali Baş Komandanın əmrini gözlədiklərini bildirirlər.

Savalan İmanov (Qubadlı): “Hörmətli Prezident, Sizin qətiyyətiniz, uğurlu daxili və xarici siyasətiniz nəticəsində müzəffər Ordumuzun cəbhədə düşmənə vurduğu ağır və sarsıdıcı zərbələr xalqımızın qələbə əzmini yüksəldib, torpaqlarımızın azad olunacağına inamı daha da möhkəmləndirib. Sizin böyük sərkərdəlik bacarığınız, qətiyyətiniz və mətinliyiniz xalqımızda, cəbhədə döyüşən igid əsgərlərimizdə böyük ruh yüksəkliyi yaradıb. Hər birimiz bunun şahidiyik. Bu qələbədən riqqətə gəlmiş Qubadlı gəncləri torpaqlarımızı düşmən tapdağından xilas etmək üçün Sizin əmrinizi gözləməkdədir.

Cənab Ali Baş Komandan, bizə yaşatdığınız ilk qələbə sevincinə görə Sizə hədsiz dərəcədə minnətdarıq”.

Şahid Rzayev (Gəncə): “Son zamanlar cəbhə bölgəsində Ordumuzun apardığı uğurlu əməliyyatlar bizi tam əmin etdi ki, işğal altında olan torpaqlarımız tezliklə düşmən tapdağından azad ediləcək və biz məcburi köçkünlər öz ata-baba yurdumuza qayıdacağıq. Möhtərəm Prezidentimiz, biz Sizin apardığınız daxili və xarici siyasəti daim dəstəkləmişik və bundan sonra da dəstəkləyəcəyik. Bu gün hər birimiz Sizin əmrinizi gözləyirik və torpaqlarımızın azadlığı uğrunda silaha sarılaraq döyüşməyə hazırıq.

Cənab Prezident, Sizə uzun ömür, möhkəm cansağlığı arzulayır, məcburi köçkünlərə göstərdiyiniz diqqət və qayğıya görə minnətdarlığımızı bildiririk”.

Tale Qardaşov (İsmayıllı): “Hörmətli Prezident, cənab Ali Baş Komandan. Son illərdə respublikamızın inkişafı və apardığınız uğurlu siyasət nəticəsində ölkəmiz gündən-günə inkişaf edir. Əlbəttə, bu inkişaf Ordumuzun qüdrətlənməsinə də öz təsirini göstərir. Beynəlxalq təşkilatlarda qətiyyətli çıxışlarınız hər bir vətənpərvər gənc kimi bizdə də fəxarət doğurur. İnanın, Azərbaycan gəncliyi apardığınız uğurlu siyasəti bəyənir və dəstəkləyir.

Cənab Ali Baş Komandan, bir vətəndaş və Sizin sıravi əsgəriniz kimi torpaqlarımızın azad olunması üçün əmrinizi gözləyirik. Əminik ki, Sizin rəhbərliyiniz altında uğurlarımız daha da artacaq”.

Eyni fikirlər Sumqayıtdan Mahir Vəkilov, Füzulidən Qoşqar Əsədov, Bakıdan Rəna Mirzəzadə, Əlisahib Hüseynov, Qaxdan Əsmər Rəsulova, Lənkərandan Cəmil Rüstəmov, Sumqayıtdan Nəimi Nəbiyev, Ordubaddan Kazım Musayev, Hacıqabuldan Murad Əliyev, Rusiyada yaşayan soydaşlarımız Eldar İrzayev, Təbriz Səftərzadə, Niderlandın Deventer şəhərindən Xatirə Abdullazadə və başqaları tərəfindən Prezidentə ünvanlanan bir çox məktublarda da yer alır.

Prezidentin poçtuna son hadisələrlə bağlı məktub və müraciətlər daxil olmaqda davam edir.