PUŞKİNİN XATİRƏSİ YAD EDİLMİŞDİR

07.06.2004 [13:15]
Çap et
A⁺ A^-

6 iyun böyük rus şairi Aleksandr Puşkinin anadan olduğu gündür. Ümummilli liderimiz Heydər Əliyevin təşəbbüsü ilə üç il bundan əvvəl Bakıda dünya şöhrətli şairin abidəsi ucaldılmışdır. Həmin vaxtdan puşkinsevərlər hər il şairin anadan olduğu günü onun abidəsi önünə tər çiçək dəstələri qoymaqla, şerlərindən parçalar oxumaqla yad edirlər.

AZƏRTAC-ın müxbiri xəbər verir ki, rus poeziyasının həvəskarları bu il də şairin anadan olmasının 205-ci ildönümünü onun abidəsi önündə qeyd etmişlər. “Sodrujestvo” cəmiyyətinin sədri Tatyana Kərimova A.Puşkinin xatirəsinin yad olunması ilə bağlı Rusiya Federasiyasının ölkəmizdəki səfirliyi ilə birgə görülən işlər barədə məlumat vermişdir.

Rusiya səfirinin xanımı Tatyana Ryabova, səfirliyin məsləhətçisi Vladimir Jitnikov Puşkinə böyük sevgi və məhəbbət bəslənildiyinə, ehtiram göstərildiyinə görə səfirlik adından Azərbaycan dövləti və xalqına dərin minnətdarlıqlarını bildirmişlər.

Bakı Slavyan Universitetinin dosenti Qalina Şipulina Puşkinin şerlərindən parçalar oxumuşdur.

Tədbirdə Bakıdakı 145 nömrəli orta məktəbin şagirdlərinin ifasında böyük şairin uşaqlara həsr etdiyi şerləri və nağılları səslənmişdir.

Məktəblilər “Sodrujestvo” cəmiyyətinin Fəxri fərmanını almışlar. Rusiya səfirliyi “A.S.Puşkin Ensiklopediyası”nı onlara hədiyyə etmişdir.