DÜNYA
QAHİRƏ HAVANIN ÇİRKLƏNMƏSİ İLƏ MÜBARİZƏYƏ GÖRƏ BEYNƏLXALQ MÜKAFATA LAYİQ GÖRÜLMÜŞDÜR
AZƏRTAC Misirin MENA agentliyinə istinadla xəbər verir ki, dünyanın ən iri şəhərlərindən olan Qahirə havanın çirklənməsi ilə mübarizəyə görə beynəlxalq mükafata layiq görülmüşdür. Mükafat atmosferin təmizliyi uğrunda mübarizə üzrə Beynəlxalq proqram tərəfindən təsis edilmişdir. Bu proqramı ABŞ Energetika Nazirliyi həyata keçirir.
Misirin neft naziri Samih Fəhmi bildirmişdir ki, 17 milyon insanın yaşadığı Qahirədə hava 51 min avtomobilin qaz yanacağına keçməsi sayəsində təmiz olmuşdur. Misir avtomobil nəqliyyatında qaz yanacağından istifadəyə dair ümummilli proqram həyata keçirir.
Vaxtilə Qahirənin və onun ətrafındakı qəsəbələrin havası müalicəvi əhəmiyyətli hesab edilirdi, paytaxtın yaxınlığındakı Heluan şəhərində isə ağciyər vərəminə tutulmuş xəstələr üçün beynəlxalq kurort var idi (Ukrayna yazıçısı Lesya Ukrainka burada dəfələrlə müalicə olunmuşdu).