“Qalib ölkənin qalibləri“ mükafatlandırılıb
Bakı, 17 dekabr, AZƏRTAC
Dekabrın 17-də Ailə, Qadın və Uşaq Problemləri üzrə Dövlət Komitəsinin təşkilatçılığı və istedadlı uşaqların iştirakı ilə “Qalib ölkənin qalibləri-2024” layihəsinin mükafatlandırılma mərasimi keçirilib.
AZƏRTAC xəbər verir ki, tədbirdə əvvəlcə Azərbaycanın Dövlət Himni səsləndirilib, Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Sonra cari ildə istedadlı uşaqların qazandıqları uğurları əks etdirən videoçarx nümayiş olunub.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova uşaqların həyatlarının erkən vaxtlarından özlərini qələbəyə köklədiyini deyib, onları təbrik edərək fəaliyyətlərində yeni və daha böyük uğurlar arzulayıb.
“Qalib ölkənin qalibləri” layihəsi haqqında danışan B.Muradova artıq üçüncü dəfə müxtəlif sahələrdə Azərbaycanın adını yüksəklərə qaldıran uşaqların mükafatlandırıldığını diqqətə çatdırıb.
B.Muradova bildirib ki, hər bir ölkə üçün görüləcək ən vacib iş onun başlıca sərvəti olan insan kapitalının inkişafına sərmayə qoyulması, uşaqlara diqqət və qayğı göstərilməsidir.
Ulu Öndər Heydər Əliyev tərəfindən bünövrəsi qoyulan bu siyasətin hazırda Prezident İlham Əliyev tərəfindən uğurla davam etdirildiyini qeyd edən sədr ölkəmizin inkişaf yoluna nəzər salıb, tarixin miras qoyduğu çətinliklərdən azad olaraq ərazi bütövlüyü, suverenliyimizi bərpa etdiyimizi və bu gün bütün dünyada inkişafın Azərbaycan örnəyini yaratdığımızı söyləyib.
B.Muradova Azərbaycanda uşaqların inkişafına həsr olunmuş ictimai təşəbbüslərin və genişmiqyaslı layihələrin reallaşdırıldığını vurğulayıb, bu sahədə Birinci vitse-prezident Mehriban xanım Əliyevanın və onun rəhbərlik etdiyi Heydər Əliyev Fondunun vacib rolundan bəhs edib.
Qələbə qazanan uşaqların uğurlu nəticələrinin hər kəsi qürurlandırdığını vurğulayan komitə sədri bu gün ümumi təhsil məktəblərində yaradılan maddi-texniki bazanın, yüksək “smart” yeniliklərin uşaqların uğurlarının miqyasının daha da genişlənməsinə imkan verdiyini vurğulayıb. Bildirib ki, uşaqların nailiyyət qazandıqları hər bir sahədə peşəkar olmaları üçün bütün imkanlara əlçatanlığı təmin edilib.
Dövlət Komitəsinin uşaq və gənclərə yönəlik məsələlərlə birbaşa məşğul olduğunu diqqətə çatdıran sədr ailədəki vəziyyət, uşaqların həm ailədə, həm cəmiyyətdə, həm də ümumi təhsil məktəblərində bütün imkanlara əlçatanlığının təmin edilməsinin diqqət mərkəzində olduğunu bildirib: “Uşaq və gənclərlə işləmək həm qürurvericidir, həm də böyük zəhmət və səy tələb edir. Eyni zamanda, onlarla birgə bu yolu getmək, düşüncələrini öyrənmək, istək və arzularını dinləmək bu və ya digər ehtiyaclarını öyrənmək və təmin etmək həm şərəfli, həm çətin, həm də maraqlıdır”.
B.Muradova müxtəlif sahələrdə uğur qazanmış uşaqlarla keçirilən hər bir görüşün əhəmiyyətini vurğulayıb. “Sizin hər biriniz bizim yaddaşımızda qalib ölkənin qalib uşaqları kimi qalırsınız və dövlətə layiqli vətəndaş olacağınıza böyük inamımız var. Sizin nailiyyətləriniz, əzminiz və cəsarətiniz, parlaq gözləriniz, işıqlı üzünüz və sabaha inamlı baxışlarınız imkan verir deyək ki, Azərbaycanın gələcəyi, doğrudan da, əmin əllərdədir”, – deyə o əlavə edib.
Elm və təhsil nazirinin müavini Firudin Qurbanov müxtəlif sahələrdə qazandıqları nailiyyət münasibətilə uşaqları təbrik edib. Nazir müavini bildirib ki, bu gün gənclərin istedadının aşkar olunması və inkişaf etdirilməsi üçün hər cür şərait yaradılır: "Siz bacarıqlarınızı ölkənin iqtisadiyyatını müəyyən edən sahələrdə tətbiq edərək dövlətimizin inkişafına töhfə verəcəksiniz. Hər bir gəncdə istedad var, sadəcə, onu görmək lazımdır".
Firudin Qurbanov hər il respublika fənn olimpiadalarında kifayət qədər istedadlı şagirdin iştirak etdiyini və aşağı siniflərdə təhsil alanların olimpiada mərkəzlərinə cəlb olunduqlarını diqqətə çatdırıb. Vurğulayıb ki, bir neçə il öncə olimpiadalarda yüksək nəticələr əldə edən gənclər hazırda dünyanın bir sıra ölkələrində yüksək vəzifələrdə çalışırlar.
Uşaqları dövlətin sərvəti adlandıran F.Qurbanov istedadlı uşaqların həm də ölkənin gələcək təminatçıları olduğunu vurğulayıb. Bildirib ki, bu uğurlar gələcəkdə konkret fəaliyyətə çevriləcək və ölkəmizin hərtərəfli inkişafını təmin edəcək.
Gənclər və idman nazirinin müavini Fərhad Hacıyev çıxışında bildirib ki, dünyanın hazırkı inkişaf sürətinə çatmaq üçün uşaqlar daim öz üzərində çalışmalı və müxtəlif sahələrdə potensiallarını inkişaf etdirməlidirlər.
Azərbaycanın qazandığı tarixi Qələbədən sonra övladlarımızın suverenliyini tam bərpa etmiş bir ölkədə böyüdüyünü bildirən F.Hacıyev əlavə edib ki, bugünkü güclü dövlətimizi qoruyub saxlamaq və daha işıqlı bir gələcəyə aparmaq yolunda uşaqların üzərinə böyük məsuliyyət düşür.
Mədəniyyət nazirinin müşaviri Cəsarət Valehov süni intellekt əsrində yaradıcı təfəkkürün əhəmiyyətindən bəhs edib. O, rəqəmsal dünyada öz istedadı və bacarığı ilə seçilməyi bacaran uşaqların uğurlarını yüksək qiymətləndirib.
Qalib uşaqlar adından çıxış edən Toğrul Şahtahtinski, Murad Xəlilzadə, Rəfiqə Verdiyeva dövlət tərəfindən onlar üçün yaradılan şəraitə, göstərilən diqqət və qayğıya görə minnətdarlıqlarını ifadə ediblər.
Sonda mədəniyyət sahəsində uğur qazanmış uşaqların müxtəlif musiqi alətlərində ifaları səsləndirilib.
Tədbirdə elm, təhsil, mədəniyyət və idman sahələrində il ərzində Azərbaycanı beynəlxalq olimpiada və yarışlarda təmsil edərək qalib gəlmiş 100 uşaq mükafatlandırılıb.
Bölmənin digər xəbərləri
