QAN YADDAŞI
“QAN YADDAŞI XOCALI” MÖVZUSUNDA “DƏYİRMİ MASA” KEÇİRİLMİŞDİR
Bakı, 24 fevral (AZƏRTAC). C.Cabbarlı adına Respublika Gənclər Kitabxanasında Xocalı faciəsinin 17-ci ildönümünə həsr olunmuş “Qan yaddaşı Xocalı” mövzusunda “dəyirmi masa” keçirilmişdir.
Tədbirdə kitabxana işçiıləri, Xocalı faciəsinin canlı şahidləri, Bakı Dövlət Universitetinin tələbələri iştirak etmişlər.
C.Cabbarlı adına Respublika Gənclər Kitabxanasının direktoru Tahir Sadıqov XX əsrin ən qanlı faciələrindən olan Xocalı soyqırımı haqqında danışmışdır.
Xocalı sakini, dəhşətli qırğın zamanı yaxın qohumlarını itirmiş Bahar Əsədova öz çıxışında insanlığa zidd olan soyqırımı unutmamağa çağırmış və dünya dövlətlərindən bu hadisələrə qiymət verilməsini tələb etməyin vaxtı çatdığını bildirmişdir.
“Dəyirmi masa” çərçivəsində “Əsrin faciəsi, Xocalı soyqırımı” mövzusunda diskussiya keçirilmişdir. Faciənin şahidləri tədbir iştirakçılarının suallarını cavablandırmışlar.
Xocalıya həsr edilmiş şeirlər söylənmiş, foyedə “Unudulmaz tarix, unudulmaz faciə” adlı fotostend nümayiş etdirilmişdir.