Qanunsuz ov ətlərinin istifadəsi və satışı ilə bağlı restoranlara son xəbərdarlıq edilib
Bakı, 14 mart, AZƏRTAC
İctimai iaşə müəssisələrində qanunsuz ov ətlərinin istifadəsi və satışına, həmçinin sanitar-gigiyenik tələblərə uyğunluğuna nəzarət məqsədilə IDEA İctimai Birliyi və Azərbaycan Qida Təhlükəsizliyi Agentliyi tərəfindən Ekologiya və Təbii Sərvətlər Nazirliyinin əməkdaşları ilə birgə ölkə ərazisində fəaliyyət göstərən ümumilikdə 581 qida obyektində monitorinqlər keçirilib.
IDEA İctimai Birliyindən AZƏRTAC-a verilən məlumata görə, monitorinqlər zamanı 42 obyektdə, o cümlədən Bakı şəhərində 10 və regionlarda yerləşən 32 müəssisədə qanunsuz ov əti məhsullarından istifadə edilməsi halları müəyyən olunub.
Ümumilikdə monitorinqlər zamanı həmin müəssisələrdə qanunsuz ovlanmış vəhşi heyvanların ətləri, habelə “Qırmızı kitab”a daxil edilmiş turac və tirəndaz (oxlu kirpi) ətləri aşkarlanıb. Rast gəlinən pozuntularla əlaqədar həmin müəssisələrdə qanunvericiliyə uyğun aparılmış nəzarət tədbirləri çərçivəsində məhsullar möhürlənərək dərhal satışdan kənarlaşdırılıb, həmçinin sanitar pozuntularla bağlı sahibkarlar barəsində İnzibati Xətalar Məcəlləsinin müvafiq maddələrinə uyğun olaraq inzibati tədbir görülüb.
Eyni zamanda, aparılmış nəzarət tədbirləri çərçivəsində aşkar edilmiş məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyalarında müayinə olunub. Hazırda müayinələr davam etdirilir.
Qeyd edək ki, monitorinqlər zamanı 7 obyektdə aşkar edilmiş tirəndaz (oxlu kirpi) və turac ətləri ilə bağlı Ekologiya və Təbii Sərvətlər Nazirliyi tərəfindən zəruri araşdırma aparılır.
IDEA İctimai Birliyi, Qida Təhlükəsizliyi Agentliyi, Ekologiya və Təbii Sərvətlər Nazirliyi bir daha vurğulayır ki, ətraf mühiti qorumaq hər bir kəsin vəzifəsidir. Təbiətin mühafizəsi və nəsli kəsilməkdə olan heyvan növlərinin qorunması yalnız birgə məsuliyyət çərçivəsində mümkün ola bilər. Bundan əlavə, mənşəyi məlum olmayan, baytarlıq yoxlamasından keçməyən ət məhsulları, xüsusilə də qanunsuz ov nəticəsində əldə edilən ətlər müxtəlif yoluxucu xəstəliklərin daşıyıcısı ola bilər, bu isə insanların sağlamlığı üçün ciddi təhlükə yaradır.
İctimai iaşə müəssisələrində qanunsuz ov ətlərinin istifadəsi və satışı hallarının qarşısının alınmasında ictimaiyyətin fəal iştirakı mühüm rol oynayır. Bunu nəzərə alaraq, IDEA İctimai Birliyi hər kəsi ekoloji məsuliyyət nümayiş etdirməyə, qanunsuz ovçuluğun qarşısının alınmasına töhfə verməyə və xüsusilə “Qırmızı kitab”a daxil edilmiş heyvan növlərinin ovlanması, istifadəsi və satışı ilə bağlı qarşılaşdıqda, o cümlədən restoranlarda menyuda qanunsuz ov yolu ilə əldə edilmiş ətlərə rast gəldikdə IDEA İctimai Birliyinin sosial şəbəkə hesablarına göndərməyə və qaynar xətt vasitəsilə məlumat verməyə çağırır.
IDEA İctimai Birliyinin sosial şəbəkə hesabları və əlaqə vasitələri:
• Instagram: https://www.instagram.com/idea_campaign/
• Facebook: https://www.facebook.com/ideacampaign.org/
• Qaynar xətt: 1113
• E-poçt: [email protected]
Bölmənin digər xəbərləri
