“QARABAĞ FACİƏSİ - MƏHKUM EDİLMİŞ XOCALI” KİTABI HAZIRLANIR
Bakı, 27 fevral (AZƏRTAC). Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi Şahin Sayılov bildirmişdir ki, Xocalı şəhəri işğal ediləndə 197 nəfər itkin düşmüşdür. Komissiya araşdırma apararkən 197 nəfərdən 80 nəfərinin əsirlikdə sağ olması ilə bağlı məlumat əldə edilmişdir.
Ş.Sayılov onu da demişdir ki, komissiya əsir və girovluqda olmuş, lakin sağ qalmış 753 nəfər haqqında “Bizi əsirlikdən qurtarın!” adlı Azərbaycan və ingilis dillərində kitab buraxmışdır. Hazırda komissiya “Qarabağ faciəsi - məhkum edilmiş Xocalı” adlı daha bir kitabı çapa hazırlayır. Milli Təhlükəsizlik Nazirliyinin, respublika prokurorluğunun, Daxili İşlər Nazirliyinin sənədləri və əməliyyat məlumatları əsasında hazırlanmış kitabın ilkin nüsxəsi artıq hazırdır.
Bölmənin digər xəbərləri
