Qarabağda təhsilin miqyası genişlənir: onlarla yeni müəssisə fəaliyyətə başlayıb
Bakı, 25 iyun, AZƏRTAC
Böyük Qayıdışa dair Dövlət Proqramı çərçivəsində 2025/2026-cı tədris ili ərzində işğaldan azad olunmuş ərazilərdə 12 məktəbəqədər və 25 ümumi təhsil müəssisəsi fəaliyyət göstərib.
Elm və Təhsil Nazirliyindən AZƏRTAC-a bildirilib ki, həmin dövrdə məktəbəqədər təhsil müəssisələrində 408 uşaq və 123 işçi, ümumi təhsil müəssisələrində isə 4 min 825 şagird və 700 işçi tədris prosesinə cəlb olunub.
Qeyd edək ki, Xankəndi şəhərində yerləşən Qarabağ Universiteti fəaliyyətə başladığı ilk ildən etibarən regionun akademik və sosial inkişafında mühüm rol oynayır və tələbəyönümlü mühiti ilə seçilir. Hazırda universitetdə təhsil alan tələbələr tam ödənişsiz təhsil və yataqxana ilə təmin olunur, yüksək nəticə göstərən tələbələr üçün əlavə təqaüdlər də nəzərdə tutulub.
Tədris ilinin mühüm hadisələrindən biri Prezident İlham Əliyevin iştirakı ilə Qarabağ Universitetində Biznes və iqtisadiyyat, eləcə də Tibb və sağlamlıq elmləri fakültələrinin və Qarabağ Universiteti Klinikasının açılışı olub. Eyni zamanda, Mühəndislik fakültəsinin yeni korpusunun təməli qoyulub və növbəti tədris ilindən bu fakültənin tam müasir binada fəaliyyət göstərməsi planlaşdırılır.
Bölmənin digər xəbərləri
