“Qarabağ”ın futbolçusu Bəhlul Mustafazadə Azərbaycan çempionatında 100-cü matçını keçirib
Bakı, 19 sentyabr, AZƏRTAC
“Qarabağ”ın futbolçusu Bəhlul Mustafazadə Azərbaycan çempionatında 100-cü matçını keçirib. İyirmi beş yaşlı müdafiəçinin yubileyi Azərbaycan Premyer Liqasının yeddinci turuna təsadüf edib.
AZƏRTAC Peşəkar Futbol Liqasına istinadla xəbər verir ki, futbolçu “Zirə” ilə səfər oyununa start heyətdə çıxıb. B.Mustafazadə 100 qarşılaşmada 4 qol vurub.
Müdafiəçi 4 klubun heyətində forma geyinib. 2016/2017-ci il mövsümündə “Sumqayıt”da debüt edən B.Mustafazadə bu klubda 20 (2 qol), “Qəbələ”də 23 (1 qol), “Sabah”da 35 (1 qol), “Qarabağ”da 22 dəfə meydana çıxıb.
Qeyd edək ki, “Zirə” - “Qarabağ” matçında qonaqlar 7:1 hesablı qələbə qazanıb.
Bölmənin digər xəbərləri
