Qarşıdakı yüz ildə 500-dən çox quş növü yoxolma təhlükəsi ilə üzləşə bilər
Bakı, 25 iyun, AZƏRTAC
Alimlər qarşıdakı yüz ildə yüzlərlə quş növünün nəsli kəsilə biləcəyini aşkar ediblər. AZƏRTAC “Nature Ecology and Evolution” jurnalına istinadla xəbər verir ki, yeni tədqiqat iqlim dəyişikliyinin və yaşayış mühitinin itirilməsinin növbəti əsrdə 500-dən çox quş növünün məhvinə səbəb ola biləcəyini proqnozlaşdırır.
Tədqiqatçılar xəbərdarlıq edirlər ki, hətta antropogen təhlükələrdən tam qorunsalar belə, təxminən 250 növ hələ də yoxolma təhlükəsi ilə üzləşə bilər.
Ekoloq Kerri Stüartın sözlərinə görə, quş növlərinin bir çoxunun üzləşdiyi təhlükə o qədər böyükdür ki, təkcə antropogen təsirin azaldılması onları xilas etməyəcək. Yaşamaq üçün bu növlərin çoxalma və yaşayış mühitinin bərpası layihələri kimi xüsusi proqramlara ehtiyacı var. O əlavə edib: “Biz müasir dövrdə quşların misli görünməmiş yoxolma böhranı ilə üzləşirik. Bütün yaşayış yerlərində antropogen təhlükələri azaltmaq üçün təcili tədbirlər görməliyik, ən nadir və nəsli kəsilməkdə olan növlərin xilas edilməsi istiqamətində məqsədyönlü proqramlar həyata keçirməliyik”.
Qrup bitki və heyvan növlərinin vəziyyəti ilə bağlı dünyanın ən əhatəli məlumat mənbəyi olan Beynəlxalq Təbiəti Mühafizə İttifaqının təbiətin mühafizəsi üzrə Qırmızı Siyahısının məlumatlarından istifadə edərək 10 minə yaxın quş növünü tədqiq edib. Hər bir növün üzləşdiyi təhlükələrə əsaslanaraq, quşların nəsli kəsilmə riski proqnozlaşdırılıb. Təhlil göstərib ki, irigövdəli quşlar ovçuluğa və iqlim dəyişikliyinə daha həssasdır, geniş qanadlı quşlar isə yaşayış mühitinin itirilməsindən daha çox təsirlənir.
Risk altında olan ən qeyri-adi quşların yalnız 100-ü üçün qoruma proqramlarına üstünlük vermək quşların forma və ölçülərinin müxtəlifliyinin 68 faizini xilas edə bilər. Tədqiqatçılar belə qənaətə gəliblər ki, yaşayış yerlərinin məhv edilməsinin dayandırılması daha çox quşu xilas edəcək. Bununla belə, ovçuluğun azaldılması və təsadüfi ölümlərin qarşısının alınması xüsusilə sağlam ekosistemlər üçün vacib olan qeyri-adi xüsusiyyətlərə malik quşları xilas edərdi.
Bölmənin digər xəbərləri
