Qax rayonda 40 hektar sahədə yeni meşəliklər salınacaqdır
Qax, 29 oktyabr (AZƏRTAC). Qax rayonu ərazisində dövlət meşə fonduna aid 30 min 965 hektar meşə sahəsi vardır. Bu sahənin 27 min 458 hektarı meşə bitkiləri ilə örtülmüşdür.
Qax Rayon Meşə Mühafizəsi və Bərpası İdarəsindən AZƏRTAC-a bildirmişlər ki, cari il ərzində rayonda dövlət meşə fonduna aid 70 hektar sahədə yeni meşəliklərin salınması planlaşdırılmışdır. Bu məqsədlə müəssisənin 4,4 hektar tinglik sahəsində 275 min ədəd əkin materialı - ting və toxmaçar yetişdirilmişdir.
Yaz meşə əkini dövründə müəssisə tərəfindən 30 hektar sahədə yeni meşəliklərin salınması təmin olunmuşdur. Artıq payız əkini kampaniyasına başlanılmışdır. Meşəçilər qoz, şabalıd, palıd, akasiya, katalpa və digər qiymətli ağac növlərinə üstünlük verirlər.
Payız əkini dövründə rayonda 40 hektar sahədə yeni meşəliklərin salınması planlaşdırılır. Eyni zamanda, cari ildə 410 hektar sahədə meşə-bərpa tədbirləri nəzərdə tutulmuşdur və bu istiqamətdə iş davam etdirilir.
Payız-qış mövsümünün gəlişi ilə əlaqədar olaraq idarə və təşkilatların, habelə vətəndaşların odun yanacağına olan tələbatının ödənilməsi məqsədilə müəssisə tərəfindən kök üstə qurumuş ağacların və seyrəltmə nəticəsində yaranmış tör-töküntülərin hesabına 3,1 min kubmetr odun ayrılmışdır. İndiyədək ayrılmış odunun 1,5 min kubmetrinin daşınması təmin olunmuşdur.
Bölmənin digər xəbərləri
