QAXDA XOCALI SOYQIRIMI QURBANLARININ XATİRƏSİ YAD EDİLMİŞDİR
Qax, 26 fevral (AZƏRTAC). Rayon icra hakimiyyətində Xocalı faciəsinin 17-ci ildönümü ilə əlaqədar anma mərasimi keçirilmişdir.
Tədbir iştirakçıları əvvəlcə foyedə Xocalı soyqırımına həsr olunmuş rəsm müsabiqəsi qaliblərinin əl işlərindən ibarət sərgiyə, habelə faciənin dəhşətli anlarını əks etdirən sənədli filmə baxmışlar.
İcra hakimiyyətinin başçısı Mübariz Əhmədzadə xalqımıza qarşı daim cinayətlər törədən erməni millətçilərinin 1992-ci il fevralın 25-dən 26-na keçən gecə Xocalıda həyata keçirdikləri bu qətliamın bəşəriyyətə qarşı ən dəhşətli cinayətlərdən biri olduğunu bildirmiş, faciənin səbəbləri, mahiyyəti və acı nəticələri barədə danışmışdır. O, Xocalı qırğınına hüquqi-siyasi qiymətin verilməsində və faciə barədə həqiqətlərin dünya ictimaiyyətinə çatdırılmasında ümummilli liderimiz Heydər Əliyevin tarixi xidmətlərini xüsusi vurğulamışdır.
İcra hakimiyyəti başçısının birinci müavini Tahir İsmayılovun “Xocalı faciəsi xalqımızın qan yaddaşıdır” mövzusunda məruzəsində erməni cəlladlarının xalqımıza qarşı soyqırımı siyasəti konkret faktlarla diqqətə çatdırılmışdır.
Çıxış edənlər bəşər tarixinin ən qanlı səhifələrindən olan Xocalı soyqırımının ibrət dərsləri barədə danışmış, əmin olduqlarını bildirmişlər ki, işğal altında olan torpaqlarımız Azərbaycan Prezidenti İlham Əliyevin səyləri və qətiyyəti nəticəsində geri qaytarılacaq, cinayətkarlar öz layiqli cəzalarını alacaqlar.
Bölmənin digər xəbərləri
