Qaya yarğanlarında bitən aixrizon yarpaqlarının çalarları
Bakı, 4 noyabr, AZƏRTAC
Aixrizon 20-30 santimetr diametri, 30 santimetr hündürlüyü olan dibçək çiçəyidir. Onun vətəni Madeyra, Kanar və Azor adaları, Mərakeş olsa da, Portuqaliyada da bəzi növlərinə rast gəlmək mümkündür. Əsasən qaya yarğanlarında bitir, 15-ə qədər növü var.
AZƏRTAC xəbər verir ki, sukkulent bitkinin ürəkvarı yarpaqları üzərində yaşıl rəngin bütün çalarlarına rast gəlmək olar. Yarpaqlar forma etibarilə ürəyə oxşadığına görə el arasında “sevgi və xoşbəxtlik ağacı” kimi tanınır. Düz və azca əyilmiş ətli zoğları şaxələnir və heç vaxt odunlaşmır. Çiçəkləmə dövründə yarpaqlarının 80 faizə qədərini itirir. Həmin müddətdə sulamanı intensivləşdirmək məsləhətdir. Yarpaqlar həddindən çox töküləndə aixrizonun yaşlı budaqları kəsilir.
Aixrizon parlaq və səpələnmiş işıqlı mühiti daha çox sevir. Bitkinin üzərinə düşən günəş şüalarını səpələmək üçün tül və ya tənzifdən hazırlanmış pərdələrdən istifadə etmək olar. Qərbə və şərqə baxan yaxşı işıqlanan pəncərənin qarşısına qoyulanda yarpaqlarda günəş yanıqları əmələ gələ bilər. Yaz-yay aylarında bitkinin yarpaqlarını və gövdəsini həftədə bir-iki dəfə suçiləyən vasitəsilə yumaq bitkiyə yaxşı təsir edir.
Bölmənin digər xəbərləri
