Qazaxıstan referendumla bağlı xaricdəki 11 məntəqəni bağlayıb
Astana, 10 mart, AZƏRTAC
Yaxın Şərqdə gərginləşən hərbi və siyasi vəziyyətlə əlaqədar olaraq Qazaxıstanın 10 ölkədəki 11 seçki məntəqəsinin fəaliyyəti dayandırılıb.
AZƏRTAC xəbər verir ki, bu barədə Qazaxıstan XİN-in rəsmi nümayəndəsi Erlan Jetıbayev brifinqdə bildirib.
Qazaxıstanın İran, İsrail, İordaniya, Qətər, Birləşmiş Ərəb Əmirlikləri, Oman, Livan, Küveyt, Ukrayna və Efiopiyadakı səfirliklərində, eləcə də Dubaydakı baş konsulluğunda seçki məntəqələrinin fəaliyyəti dayandırılıb. Buna görə də referendum zamanı cəmi 54 ölkədə 71 seçki məntəqəsi fəaliyyət göstərəcək.
Onun sözlərinə görə, xaricdəki seçicilərin ümumi sayı 14230 nəfər olacaq. “On beynəlxalq və regional təşkilatdan, xarici ölkələrin 27 mərkəzi seçki komissiyasından, eləcə də Qazaxıstanda akkreditə olunmuş diplomatik korpusdan 336 beynəlxalq müşahidəçinin referendumda iştirak etməsinə icazə verilməsi planlaşdırılır. Bununla yanaşı, 31 ölkədən 68 xarici media orqanının 185 nümayəndəsinin referendumu işıqlandırması nəzərdə tutulur”, - deyə Erlan Jetıbayev bildirib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
