Qərbi Azərbaycandan Salonikiyə uzanan yol
Rəşid Məmmədov: Azərbaycanı dünyada tanıtmaq hər birimizin mənəvi borcudur
Saloniki, 19 iyun, AZƏRTAC
Rəşid Məmmədov bu gün Saloniki şəhərində Azərbaycanın təbliği istiqamətində fəal çalışan soydaşlarımızdandır. O, təsisçisi olduğu "QALA" Yunanıstan–Azərbaycan Dostluq Cəmiyyəti vasitəsilə həm soydaşlarımızı bir araya gətirməyə, həm də iki xalq arasında dostluq körpülərini möhkəmləndirməyə çalışır.
AZƏRTAC Yunanıstanda yaşayan diaspor fəalı Rəşid Məmmədovla müsahibəni təqdim edir:
– Rəşid müəllim, ilk olaraq həyat yolunuz barədə qısa məlumat verərdiniz.
– Mən 1972-ci ildə Qərbi Azərbaycanın (indiki Ermənistan) Quqark rayonunun Heydərli kəndində anadan olmuşam. 1988-ci ildə ailəmiz Bakıya köçmək məcburiyyətində qaldı. 2003-cü ildə isə Yunanıstana gəldim və o vaxtdan Saloniki şəhərində yaşayıram. Ailəliyəm, iki övladım var. Burada həm sahibkarlıqla məşğul olur, həm də ictimai fəaliyyət göstərirəm.
– Xaricdə yaşamaq sizi diaspor fəaliyyətinə necə sövq etdi?
– İnsan xaricdə yaşadıqca öz milli kimliyinə daha sıx bağlanır. Yunanıstana gəldiyim ilk illərdə müşahidə etdim ki, burada yaşayan azərbaycanlıların bir-biri ilə əlaqələrinin gücləndirilməsinə böyük ehtiyac var. Eyni zamanda, yerli cəmiyyətdə Azərbaycan haqqında məlumatlar kifayət qədər deyildi və ölkəmizin geniş tanıdılması mühüm zərurətə çevrilmişdi.
Məhz bu amilləri nəzərə alaraq, 2009-cu ildən etibarən diaspor fəaliyyəti ilə aktiv məşğul olmağa başladım. Soydaşlarımızın bir araya gəlməsi, milli-mədəni dəyərlərimizin qorunması və Azərbaycan həqiqətlərinin yunan cəmiyyətinə çatdırılması istiqamətində müxtəlif layihələr və təşəbbüslər reallaşdırdıq.
– "QALA" Yunanıstan–Azərbaycan Dostluq Cəmiyyətinin yaradılması ideyası necə yarandı və təşkilat hansı məqsədlərə xidmət edir?
– Bir neçə illik fərdi və qeyri-rəsmi fəaliyyətdən sonra bu işi daha sistemli və institusional şəkildə davam etdirmək qərarına gəldik. Nəticədə, 2017-ci il fevralın 13-də Saloniki şəhərində "QALA" Yunanıstan–Azərbaycan Dostluq Cəmiyyətini rəsmi qeydiyyatdan keçirdik.
Cəmiyyətimizin əsas missiyası Yunanıstanda məskunlaşan soydaşlarımızı vahid platformada bir araya gətirmək, gənc nəslə ana dilimizin öyrənilməsini təşviq etmək, milli kimliyimizi qorumaq və ölkəmizi bu coğrafiyada layiqincə təmsil etməkdir. Bununla yanaşı, yunan ictimaiyyətinə Azərbaycanın zəngin tarixi, mədəniyyəti, multikultural dəyərləri və müasir inkişaf dinamikası barədə dürüst məlumatlar çatdırmaq da fəaliyyətimizin ana xəttini təşkil edir.
– Bəs, bu gün cəmiyyətin fəaliyyəti konkret olaraq hansı istiqamətləri əhatə edir?
– Biz çalışırıq ki, fəaliyyət coğrafiyamız və gündəmimiz yalnız mədəni tədbirlərlə məhdudlaşmasın. İki ölkə arasında turizm, iqtisadiyyat, biznes, təhsil və humanitar sahələrdə də əlaqələrin inkişafına töhfə verməyə can atırıq.
Hesab edirik ki, xalqları bir-birinə yaxınlaşdıran ən mühüm vasitə məhz qarşılıqlı tanışlıq və dialoqdur. İnsanlar bir-birinin tarixini, mədəniyyətini və dəyərlərini yaxından öyrəndikcə münasibətlər daha səmimi və möhkəm təməllər üzərində qurulur. Bu baxımdan, Azərbaycanla Yunanıstan arasında əməkdaşlıq üçün böyük potensial mövcuddur.
– Azərbaycan mədəniyyətinin təbliği istiqamətində hansı layihələri həyata keçirmisiniz?
– İllər ərzində çoxsaylı tədbirlər, təqdimatlar, sərgilər və görüşlər təşkil etmişik. Azərbaycan musiqisi, milli mətbəxi, xalçaçılıq sənəti, tariximiz və mədəniyyətimizlə bağlı proqramlar həyata keçirmişik. Yerli festivallarda Azərbaycan stendləri ilə iştirak etmişik. Hər dəfə Azərbaycan Bayrağının müxtəlif beynəlxalq tədbirlərdə dalğalanmasını görmək böyük qürur hissi yaradır.
Biz, həmçinin Qarabağ həqiqətləri, Xocalı soyqırımı və Azərbaycanın müasir inkişafı barədə məlumatlandırma işləri aparmışıq. Məqsədimiz həqiqətlərin beynəlxalq ictimaiyyətə çatdırılmasıdır.
– Azərbaycan-Yunanıstan münasibətlərini necə dəyərləndirirsiniz?
– Azərbaycan ilə Yunanıstan arasında münasibətlər çoxşaxəli xarakter daşıyır. Diplomatik münasibətlər 1992-ci ilin aprel ayında qurulub. Sonrakı illərdə əlaqələr siyasi, iqtisadi, enerji, mədəniyyət, kənd təsərrüfatı və digər sahələr üzrə inkişaf edib. Xüsusilə enerji təhlükəsizliyi sahəsində əməkdaşlıq iki ölkə münasibətlərində mühüm yer tutur. Azərbaycanın Avropanın enerji təhlükəsizliyinə verdiyi töhfə Yunanıstanda da yüksək qiymətləndirilir.
Hesab edirəm ki, gələcəkdə iqtisadi və humanitar sahələrdə əməkdaşlıq imkanları daha da genişlənəcək.
– Xaricdə yaşayan azərbaycanlıların üzərinə hansı məsuliyyət düşür?
– Harada yaşamağımızdan asılı olmayaraq, biz Azərbaycanı təmsil edirik. Xaricdə yaşayan hər bir azərbaycanlı ölkəsinin mədəniyyətini, tarixini və milli dəyərlərini tanıtmaq üçün çalışmalıdır. Mən xüsusilə gənc nəslin milli kimliyini qorumasını vacib hesab edirəm. Dilimizi, tariximizi və ənənələrimizi gələcək nəsillərə ötürmək diaspor fəaliyyətinin ən mühüm istiqamətlərindən biridir. Azərbaycançılıq ideyasının yaşadılması və gücləndirilməsi bizim hamımızın ortaq vəzifəsidir.
– Gələcək planlarınız nələrdir?
– Qarşıdakı illərdə fəaliyyətimizi daha da genişləndirmək niyyətindəyik. Yeni mədəni layihələr, gənclərlə bağlı proqramlar və Azərbaycan-Yunanıstan əməkdaşlığına xidmət edən təşəbbüslər üzərində işləyirik. Əsas məqsədimiz Azərbaycanın Yunanıstanda daha yaxından tanınmasına, iki xalq arasında dostluğun möhkəmlənməsinə və xaricdə yaşayan soydaşlarımızın təşkilatlanmasına töhfə verməkdir. İnanıram ki, güclü diaspor Azərbaycanın dünyadakı nüfuzunun artmasına xidmət edən ən vacib amillərdən biridir.
– Müsahibəyə görə təşəkkür edirik.
– Mən də təşəkkür edirəm. Fürsətdən istifadə edərək, dünyanın müxtəlif ölkələrində yaşayan bütün soydaşlarımızı milli birlik və həmrəylik ətrafında daha sıx birləşməyə çağırıram. Azərbaycanın uğuru bizim ortaq uğurumuzdur.
Bölmənin digər xəbərləri
