Qobu kəndindəki kərpic zavodundan atmosferə tullantıların atılması ilə bağlı şikayət araşdırılıb
Bakı, 9 aprel, AZƏRTAC
Abşeron rayonunun Qobu kəndi ərazisində yerləşən kərpic zavodunun fəaliyyəti zamanı atmosferə tullantıların atılması və qanunsuz qazıntı işlərinin aparılması ilə bağlı daxil olan şikayət 4 saylı Regional Ekologiya və Təbii Sərvətlər İdarəsinin əməkdaşları tərəfindən araşdırılıb.
AZƏRTAC xəbər verir ki, bu barədə idarənin rəisi Asif Məcidov məlumat verib.
Rəis deyib: “Dövlət Mineral Xammal Ehtiyatlarından İstifadə Agentliyi ilə birgə aparılan araşdırma və monitorinq zamanı zavoddan atmosfer havasına normadan artıq tullantının atılmadığı, ərazidə hasilat işi aparan zavodun kərpic istehsalı üçün Dağ-mədən Ayırması Aktı ilə yer təkindən istifadə hüququnun və ekoloji normativ sənədlərinin olduğu müəyyən edilib. Eyni zamanda, sənaye təyinatlı torpaq sahəsində yerləşən zavodun 2005-ci ildən müvafiq sənədlər əsasında fəaliyyət göstərdiyi məlum olub. İcra orqanlarının verdiyi məlumatda isə yaşayış evlərinin zavodun ətrafında sonradan tikildiyi və sanitar mühafizə zolağının tələblərinin gözlənilmədiyi bildirilib”.
A.Məcidov onu da qeyd edib ki, 2024-cü il avqustun 27-də həmin kərpic zavodunda keçirilən monitorinq və araşdırma zamanı zavodda qaz-toz tutucu qurğunun quraşdırılmadığı müəyyən edilmişdi. Faktla bağlı müəssisənin icraçı direktoru Məcid Məmmədov barəsində protokol tərtib edilərək 2 min manat məbləğində cərimə olunmuşdu. Ona qaz-toz tutucu qurğunun quraşdırılması üçün “ekoloji tələb” verilmiş və qurğunun quraşdırılması təmin edilmişdi.
Bölmənin digər xəbərləri
