Qran-Prinin qalibi olan ağırlıqqaldıran: Bu, mənim üçün heç də kiçik nailiyyət deyil
Bakı, 14 dekabr, AZƏRTAC
"Yarış ağır mübarizə şəraitində keçdi. Çıxışımdan razıyam, amma düşünürəm ki, daha yaxşısını edə bilərdim".
Bu sözləri AZƏRTAC-a açıqlamasında Qətərin paytaxtı Dohada keçirilmiş II Qran-Pri yarışında qızıl medal qazanan Azərbaycan ağırlıqqaldıranı Dadaş Dadaşbəyli deyib.
109 kiloqram çəki dərəcəsində çıxış edən atlet bildirib ki, müalicə aldığı üçün yarışa tam şəkildə hazırlaşa bilməyib: "Bilirəm ki, çoxları bu çıxışımı dünya çempionatındakı nəticəmlə müqayisə edəcək. Çünki bu dəfə səhhətimdə olan problem səbəbindən daha az çəki qaldırdım. Buna baxmayaraq, qələbə qazandım. Bu, mənim üçün heç də kiçik nailiyyət deyil".
"Qarşıda lisenziya xarakterli bir neçə turnir də var. Bu yarışlardan da yaxşı nəticə ilə ayrılmaq üçün əlimdən gələni edəcəyəm" - , idmançı əlavə edib.
Qeyd edək ki, D. Dadaşbəyli birdən qaldırmada 176 kiloqramı ram edib və bu hərəkətdə qızıl medal qazanıb. O, təkanla qaldırma hərəkətində isə 212 kiloqramı başı üzərinə qaldıraraq gümüş medala sahib çıxıb. Atlet yekun sıralamada da hamını qabaqlayıb və öz çəkisində qalib olub.
Bölmənin digər xəbərləri
