Qulam İshaqzai: Koronavirusla mübarizədə hər kəs öz məsuliyyətini dərk etməlidir
Bakı, 25 iyun, AZƏRTAC
Koronavirus pandemiyası insanların sağlamlığına və iqtisadi fəaliyyətə mənfi təsir göstərir. Hazırda bu virus hansısa bölgələri, ölkələri hədəfə almır, bütün sərhədləri aşır, yaşlılara, gənclərə yoluxur. İkinci Dünya müharibəsindən sonra bu pandemiyaya oxşar bir hadisə baş verməmişdi və BMT belə bir təhlükə ilə üzləşməmişdi. Buna görə də BMT-nin Baş katibi hər kəsi qlobal səviyyədə həmrəyliyə çağırıb.
AZƏRTAC xəbər verir ki, bu fikirləri iyunun 25-də Nazirlər Kabineti yanında Operativ Qərargahın mətbuat konfransında BMT-nin Azərbaycandakı rezident əlaqələndiricisi Qulam İshaqzai deyib.
Qulam İshaqzai bildirib ki, hökumətlər bu virusa yalnız öz gücü ilə qalib gələ bilməyəcək, cəmiyyət dəstək göstərməlidir. Hamımız əl-ələ verərək bu pandemiyaya qalib gəlməliyik. Tibbi maska taxmaqla, sosial məsafəni gözləməklə, şəxsi gigiyenaya diqqət yetirməklə, sosial hərəkətliliyi azaltmaqla bu mübarizəyə töhfə verə bilərik. Buna görə də hər kəs öz məsuliyyətini dərk etməlidir.
Rezident əlaqələndirici deyib ki, pandemiya səbəbindən kifayət qədər iqtisadi problemlər də olub. Virusa qalib gəlməsək, iqtisadiyyatı bərpa edə bilməyəcəyik.
Bölmənin digər xəbərləri
