QUM ŞƏHƏRİNDƏ TƏHSİL ALAN AZƏRBAYCANLI TƏLƏBƏLƏR XOCALI SOYQIRIMININ İLDÖNÜMÜNƏ HƏSR OLUNMUŞ MƏRASİM KEÇİRMİŞLƏR
Qum, 26 fevral (AZƏRTAC). İranın Qum şəhərindəki Xomeyni adına Dini Akademiyada təhsil alan azərbaycanlı tələbələr Xocalı soyqırımının 17-ci ildönümü ilə əlaqədar anma mərasimi təşkil etmişlər.
Akademiyanın əsas binasında Xocalı soyqırımı dəhşətlərini əks etdirən fotoşəkillərdən ibarət stendlər düzəldilmiş, lövhələrdə hadisə barədə Azərbaycan, ingilis və fars dillərində mətnlər yerləşdirilmişdir.
Mərasimi giriş sözü ilə açan tələbə Mir İsmayıl 1992-ci il fevralın 25-dən 26-a keçən gecə ermənilərin Xocalıda törətdikləri vəhşiliklərdən danışmışdır.
Şəhidlərimizin ruhuna dualar oxunduqdan sonra erməni cəlladların amansızcasına qətlə yetirdikləri günahsız insanların ruhu bir dəqiqəlik sükutla yad edilmişdir. Sonra Xocalı soyqırımı ilə bağlı sənədli film nümayiş etdirilmişdir.
Elmi-Mədəni maarif tələbə təşkilatının hazırladığı tədbirdə Heydər Əliyev Fondunun təqdim etdiyi “Qarabağ həqiqətləri” toplusu əsasında səfirliyin fars dilində çap etdirdiyi materiallar və müxtəlif sənədli filmlərin diskləri burada təhsil alan xarici ölkə vətəndaşlarına paylanmışdır.
Tələbələrimizin bu işini yüksək qiymətləndirən Azərbaycanın İrandakı səfiri Abbasəli Həsənov demişdir ki, Xocalı soyqırımı XX əsrin ən dəhşətli hərbi cinayətlərindən biridir. Azərbaycan xalqı heç vaxt bu cinayəti törədənləri bağışlamayacaqdır. Dünya birliyinin Xocalı soyqırımına qarşı nümayiş etdirdiyi biganəlik, gələcəkdə də belə tarixi cinayətlərin təkrar olunacağı ilə nəticələnə bilər.
Azərbaycanın Tehrandakı səfirliyinin əməkdaşları mərasimdə iştirak etmişlər.
Mərasim səfirlik tərəfindən açılan ehsan süfrəsi ilə davam etdirilmişdir.
Sabir Şahtaxtı
AZƏRTAC-ın xüsusi müxbiri
Qum
Bölmənin digər xəbərləri
