“Real Madrid” səfərdə “Valensiya”nı 4:1 hesabı ilə məğlub edib
Bakı, 28 yanvar, AZƏRTAC
İspaniya La Liqasının 21-ci turunda “Real Madrid” səfərdə “Valensiya”nı 4:1 hesabı ilə məğlub edib.
AZƏRTAC xəbər verir ki, “Mestalya” stadionunda oynanılan görüşdə madridlilər 16-cı və 38-ci dəqiqələrdə Kriştiano Ronaldonun 11 metrlik cərimə zərbələrindən vurduğu qollarla ilk hissəni üstün başa vurublar.
Matçın 58-ci dəqiqəsində Santi Mina bu qollardan birinin əvəzini çıxsa da, 84-cü dəqiqədə Marselo və 89-cu dəqiqədə Toni Kroos hesab arasındakı fərqi yenidən artırıblar.
Beləliklə, ötən tur “Deportivo”nu 7:1 hesabı ilə ağır məğlubiyyətə uğradan “Real Madrid” ardıcıl ikinci qələbəsini qazanıb.
“Valensiya” isə 20-ci turda səfərdə “Las Palmas”a 1:2 hesabı ilə məğlub olmuşdu.
La Liqada 21 turdan sonra “Valensiya” 40 xalla üçüncü sıradadır. Bir oyun az keçirən “Real” isə 38 xalla dördüncü sırada qərarlaşıb.
Çempionatın lideri bu gün doğma meydanda “Deportivo”nu qəbul edəcək “Barselona”dır. Kataloniya təmsilçisinin aktivində 54 xal var. Bu gün ev oyununda “Las Palmas” ilə üz-üzə gələcək “Atletiko Madrid” isə 43 xalla ikinci pillədədir.
Bölmənin digər xəbərləri
