Regional sülh və təhlükəsizlik üçün ən başlıca təhlükə Ermənistanın Azərbaycana qarşı təcavüzüdür
Azərbaycanın Xarici İşlər Nazirliyinin mətbuat xidmətinin rəhbəri vəzifəsini icra edən Hikmət Hacıyev Ermənistan prezidenti Serj Sarkisyanın “New York Times” qəzetinin Ermənistana aid reklam bölməsindəki 23 oktyabr tarixli müsahibəsinə şərh verib.
H.Hacıyev deyib ki, ifrat millətçi, irqçi və şovinist xarakterli çıxışlar edərək əslində Ermənistanın öz daxilində mövcud olan problemlərdən fikri yayındırmağa çalışan və Ermənistan-Azərbaycan, Dağlıq Qarabağ münaqişəsinin həllinə əngəl yaratmağa çağıran Ermənistan prezidenti Serj Sarkisyana aşağıdakıları xatırlatmaq istərdik:
“Serj Sarksiyanın dövlət idarəçilik metodu bütün meyarlar üzrə hərbi diktaturanın ən ifrat nümunəsidir. Ermənistan ictimaiyyəti bu idarəçilik üsulunu və siyasi sistemi hətta kriminal-oliqarx xarakterli hərbi diktatura rejimi adlandırır.
Ermənistanda 2008-ci il prezident seçkilərindən sonra dinc nümayiş iştirakçılarının odlu silahdan atəşə tutulmasını əmr edən və erməni müxalifətinin iddia etdiyi kimi “kriminal qaydalar” əsasında öz rəqiblərinin qətlini sifariş edən Serj Sarkisyanın yürütdüyü siyasət nəticəsində Ermənistan əhalisinin 40 faizindən artığı ifrat yoxsulluq səviyyəsində yaşayır və demoqrafik fəlakət astanasında olan bu ölkənin xarici borcları ümumi daxili məhsulu bir neçə dəfə üstələyir.
İnsanlığa qarşı cinayət əməllərinə görə bilavasitə məsuliyyət daşıyan və faşizm ideologiyası əsasında irqçi “etno-dini Nzhdehiszm”i - “erməni xalqının etnik üstünlüyü”nü rəhbərlik etdiyi respublika partiyasının və dövlət siyasətinin hakim irqçi ideologiyası elan edən, öz ölkəsinin gənclərini qonşu xalqlarla gələcək müharibəyə səsləyən Serj Sarkisyanın sülhdən danışmağa nəinki siyasi-hüquqi, hətta əxlaqi-mənəvi haqqı belə yoxdur.
Regional sülh və təhlükəsizlik üçün ən başlıca təhlükə Ermənistanın Azərbaycana qarşı təcavüzüdür. Azərbaycan Respublikasının ərazi bütövlüyü və suverenliyinə qarşı hərbi gücdən istifadə edərək ərazisinin 20 faizini işğal etməklə Ermənistan BMT Nizamnaməsini, işğal olunmuş ərazilərdə və Ermənistan ərazisində Azərbaycan xalqına qarşı qanlı etnik təmizləmə və insanlığa qarşı cinayət törətməklə beynəlxalq humanitar hüququ kobud şəkildə pozub. İşğal və təcavüz və insaniyyətə qarşı cinayət əməllərinə görə müasir beynəlxalq hüquqda dövlətlərin və hətta fərdlərin məsuliyyəti aydın şəkildə müəyyən olunub. Bu əməllərə görə Ermənistan və onun indiki rəhbərliyi birbaşa məsuliyyət daşıyır.
BMT Təhlükəsizlik Şurasının 822, 853, 874 və 884 saylı qətnamələrini təhrif etməyə çalışan Ermənistan prezidentinin yaddaşını bir daha təzələmək istərdik. BMT baş katibinin bu qətnamələrlə əlaqədar 1994-cü il 31 oktyabr tarixli SG/SM/5460 saylı bəyanatında deyilir: “BMT-nin mövqeyi Təhlükəsizlik Şurası tərəfindən qəbul edilmiş qətnamələrdə əks olunan dörd prinsipə əsaslanır. Birinci prinsip Azərbaycanın ərazi bütövlüyüdür. İkinci prinsip beynəlxalq sərhədlərin toxunulmazlığıdır. Üçüncü prinsip ərazi əldə etmək üçün zordan istifadənin qəbuledilməzliyidir. Dördüncü prinsip bütün xarici qoşunların dərhal və qeyd-şərtsiz işğal edilmiş Azərbaycan ərazilərindən çıxarılmasıdır”.
Azərbaycan tərəfindən böyük sülh sazişinin imzalanması və strukturlaşdırılmış əsasda və predmetli şəkildə danışıqların aparılmasının gündəmə gətirilməsi ilə çıxılmaz vəziyyətə düşən Ermənistan prezidenti və xarici işlər naziri son günlər yalnız bəhanələr və əsassız ittihamlara üz tutub. Məqsədyönlü şəkildə texniki məsələləri gündəmə gətirməklə Ermənistan diqqəti münaqişənin əsl mahiyyətindən yayındırmağa çalışır.
Sözdə “münaqişənin sülh yolu ilə həllini”, “ATƏT-in Minsk qrupunun həmsədrlərinin səylərini” dəstəklədiyini deyən Ermənistan real olaraq münaqişənin həlli üçün heç bir addım atmayıb. Münaqişənin həllinə nail olmaq üçün isə ilk növbədə Ermənistan öz silahlı qüvvələrini işğal olunmuş Azərbaycan ərazilərindən çıxarmalıdır.
Bölmənin digər xəbərləri
