Rənglərin və naxışların sehrində keçən ömür
Daşkəsən, 20 yanvar, Vüsalə Cənnətova, AZƏRTAC
Rəssamlıq sənəti insana dünyaya, həyata müxtəlif baxış bucaqları ilə nəzər yetirməyi öyrədir. Yeni ideyalar yaratmaq, öz daxili dünyasını ifadə etməyi bacarmaq, gözəlliyi paylaşmaq imkanı mənəvi rahatlıq və ruhi qida mənbəyidir. Rəssam Mehdab Ramazanova da bütün bunlardan güc alaraq illərdir ki, bu sənətin eşqi ilə yaşayıb, yaradır.
AZƏRTAC-ın bölgə müxbiri rəssamla həmsöhbət olub, onun yaradıcılığı ilə maraqlanıb. Rəssam deyir ki, bəzi insanlar rəngləri, formaları, kompozisiyanı, incəsənəti hiss etmək və onu vizual şəkildə ifadə etmək qabiliyyəti ilə doğulurlar. Mehdab Ramazanova da rəssamlıq bacarığının ona irsən keçdiyini düşünür. “Babamın rəssamlıq qabiliyyəti var idi, ondan ilham almışam. Gəncə şəhərindəki Uşaq İncəsənət Məktəbinin tələbəsi olmuşam. Ardından Azərbaycan Rəssamlıq Akademiyasında xalçaçı-rəssam ixtisası üzrə təhsil almışam. Rəssam kimi fəaliyyətimlə yanaşı, 13 ildir ki, Daşkəsən rayon Uşaq İncəsənət məktəbində müəllim işləyirəm, istedadlı uşaqlara bu sənətin sirlərini tədris edirəm”, - deyə o bildirib.
Rəssam deyir ki, əsasən kətan üzərində işləyir. Portret, mənzərə, natürmort, animalistik janrda rəsmləri çəkərkən sulu, yağlı boyadan istifadə edir. Xalça eskizləri yaratmaq, milli elementləri təsvir edib, canlandırmaq isə ona xüsusi zövq verir. O, xalçanı yalnız material olaraq yox, həm də duyğu və ifadə vasitəsi kimi görür: “Xalça, sadəcə dekorativ əşya deyil. Evlərimizin yaraşığı olan xalça həm də tarixdən gələn hekayənin, rənglərin və naxışların dilinin, rəssamın düşüncəsinin əksidir. Hər bir eskiz, ipliklərin içində gizlənmiş xatirələri və ruhu daşıyır. Eskizlərimdə həm klassik Azərbaycan xalçalarının elementləri, həm də müasir formalar var. Naxışlarda ulduzlar, gül budaqları, dalğalı xətlər və coşqun ornamentlər bir-biri ilə oynayır. Rəng palitrası isə təbiətdən ilhamlanır”.
Onun kağız üzərində hazırladığı eskizlər gələcəkdə toxunacaq ipliklərin ilk nəfəsi, rənglərin ilkin əks-sədasıdır. Rəssam bədii ifadənin möhtəşəm nümunələrindən biri olan vitraj sənəti ilə də məşğuldur. Əl işlərində milli ornamentlərin təsvirinə xüsusi önəm verir. “Çalışıram ki, hər bir əl işim tarixlə dialoq, keçmişlə bu günün görüşünə zəmin yaratsın, gözlərdə heyranlıq, ruhda sükut və dərin düşüncə oyatsın. Hər bir naxış əsrlərin ənənəsini, xalqın mədəniyyətini və estetik zövqünü əks etdirsin. Milli üslub həm rənglərin harmoniyası, həm də formaların simmetrik və ritmik quruluşu ilə özünü göstərsin. Ebru sənəti ilə də məşğulam. Burada hər bir naxış rəssamın ruhundan gələn bir nəfəs, təbiətin incə ritmlərindən doğan nağıl kimidir”, - deyən Mehdab Ramazanova bildiklərini şagirdləri ilə bölüşməkdən də zövq alır. Elə müxtəlif tədbirlərə, sərgilərə də onlarla birgə qatılır.
“Mən vaxtilə “Azərbaycan abidələri uşaqların gözü ilə” Uşaq İncəsənət Sərgisində iştirak etmişdim. Əl işlərim rəğbət qazanmışdı, bu isə mənə stimul vermişdi. Mən də balaca istedadlara dəstək olmağı özümə borc bilirəm. Ötən il Daşkəsən rayonundan ilk dəfə olaraq bir şagirdim Uşaq İncəsənət Festivalında final mərhələsinədək irəlilədi. Bu, məni öz sənətimə və bir pedaqoq kimi fəaliyyətə daha da həvəsləndirir”, - deyən rəssamın ən böyük arzusu yetirmələri ilə birgə sərgi təşkil etməkdir.
Bölmənin digər xəbərləri
