Respublika Veteranlar Təşkilatında Vətən müharibəsi iştirakçılarının bir qrupu ilə görüş keçirilib
Bakı, 1 mart, AZƏRTAC
Azərbaycan Respublikası Müharibə, Əmək və Silahlı Qüvvələr Veteranları Təşkilatında 44 günlük Vətən müharibəsinin iştirakçıları ilə görüş keçirilib.
Təşkilatdan AZƏRTAC-a bildiriblər ki, Veteran hərəkatına 44 günlük Vətən müharibəsi iştirakçılarının cəlb edilməsi, onların bilik və bacarıqlarından, potensialından gənc nəslin vətənpərvərlik tərbiyəsində istifadəsi, respublikamızın çiçəklənməsi, xalqımızın birliyinin əbədi olması tədbirin qayəsini təşkil edib.
Görüşdə çıxış edən Respublika Veteranlar Təşkilatının sədri, İkinci Dünya müharibəsinin iştirakçısı Fatma Səttarova Vətən müharibəsinin Azərbaycanın qəhrəmanlıq tarixinə qızıl hərflərlə yazıldığını bildirib. Vurğulanıb ki, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu böyük şücaət və yüksək döyüş hazırlığı göstərərək torpaqlarımızı işğaldan, düşmən tapdağından azad edib. Tarix yazan qəhrəman Ordumuz, əsgər və zabitlərimiz Azərbaycanın haqq-ədalət uğrunda mübarizə aparmaq əzmini, əsl döyüş ruhunu bütün dünyaya nümayiş etdirib.
Azərbaycan xalqı tarixin bütün mərhələlərindən alnıaçıq çıxmağı bacarıb, mərdliyi qəhrəmanlığı ilə seçilib. İkinci Dünya müharibəsində 600 mindən çox azərbaycanlı döyüşüb, dünyanın faşizm bəlasından azad edilməsində misilsiz qəhrəmanlıqlar göstərib. Ədalətin, sülhün dünyada bərpa edilməsində azərbaycanlı adını iftixarla daşıyıblar.
Təşkilatın sədri, həmçinin Vətən müharibəsindən sonra başlamış və əzmlə davam etdirilən quruculuq işlərinin respublikamızın iqtisadiyyatına və hərbi potensiallının daha da yüksəlməsinə səbəb olacağını deyib. Müzəffər Azərbaycan Ordusunun hər zaman düşmənin istənilən mənfur təxribatının qarşısının alacağına və layiqli cavab verə biləcəyinə əminlik bildirilib.
Respublika Veteranlar Təşkilatının sədr müavini, polkovnik Cəlil Xəlilov Təşkilat və onun həyata keçirdiyi təbirlər haqqında məlumat verib. O diqqətə çatdırıb ki, Vətən müharibəsinin Prezident, Silahlı Qüvvələrin Ali Baş Komandanı İlham Əliyevin elan etdiyi “Qarabağ Azərbaycandır və nida” şüarı xalqımızın müqəddəs vətən torpağı uğrunda savaşının ideya qayəsi, qələbəyə səsləyən rəhbər çağırışı olub. Qırx dörd gün davam edən müharibədə səfərbərlik xalqımızın dövlətimizin başçısının ətrafinda sıx birləşməsinin bariz ifadəsi olmaqla yanaşı, eyni zamanda, yeni və qüdrətli Azərbaycanın bütün dünyada özünütəsdiqi kimi qəbul edilib.
Müzəffər Azərbaycan Ordusunun zəfər yürüşü, düşmənin torpaqlarımızdan qovulması, Qarabağın, xüsusən də xalqımızın ləyaqət və qürur simvolu olan Şuşanın işğaldan tam azad edilməsi, uzun illər düyünə düşmüş və region üçün təhlükə mənbəyi olan Dağlıq Qarabağ münaqişəsinin uğurla və ədalətlə həll edilməsi, həm də yaşadığımız bölgədə sülhə və təhlükəsizliyə əvəzsiz töhfədir. Savaş meydanında əldə etdiyimiz tarixi qələbənin ardınca Azərbaycanı daha böyük gələcək, daha firavan həyat gözləyir.
Təşkilatın sədr müavini hər bir veteranın, müharibə iştirakçısının sağlamlığının və maddi-sosial vəziyyətinin yaxşılaşdırılması, yaralıların reabilitasiyası, şəhidlərimizin xatirəsinin əbədi yaşadılması, onların ailələrinin maddi durumun daim diqqət mərkəzində saxlanılması və yaxşılaşdırılması üçün Prezident İlham Əliyevin son dövrlərdə imzaladığı fərman və sərəncamların, ayrı-ayrı dövlət qurumlarının bu istiqamətdə həyata keçirdikləri tədbirlərin Vətən müharibəsi iştirakçılarına verilən dəyərin bariz nümunəsi olduğunu vurğulayıb. Bütün bunların Vətən yolunda mərdlik, rəşadət nümayiş etdirən hər bir kəsin unudulmayacağına əyani sübut olduğunu söyləyib.
C.Xəlilov veteranın, qazinin bundan sonrada vətən üçün xidmət edəcəyinə, ürəklərinin onunla birgə döyünəcəyinə inamının sonsuz olduğunu bildirib. Gənc nəslin vətənpərvərlik tərbiyəsinin yüksəldilməsində, Azərbaycan xalqının birliyinin daim olmasında veteranların, müharibə iştirakçısının təcrübəsinin xüsusi önəm daşıdığını vurğulayıb.
Vətən müharibəsinin iştirakçısı, çavuş Elçin Əhmədov çıxışında qəhrəmanlıq tariximizin bir hissəsi olmaqdan qürurla danışıb. Hər bir müharibə iştirakçısının əsas amalının vətənimizin azadlığı və qələbə olduğunu diqqətə çatdırıb. O, əminliklə bildirib ki, bundan sonra da dünyaya nümayiş etdirdiyimiz birliyimiz sarsılmayacaq, qələbə əzmimiz bitməyəcək. E.Əhmədov deyib: “Müharibə iştirakçısının, veteranın, qazinin savaşdan sonra da tək amalı dövlətimizin daha da güclənməsidir. İstər azad edilmiş torpaqlarımızın bərpası, istərsə də digər sahələrdə “dəmir yumruğ”umuz getdiyimiz yolları işıqlandıracaq, vətən, millət təəssübkeşliyimiz gücümüzə güc qatacaq. Hər birimiz veteran, qazi adını fəxrlə daşıyacaq, ölümləri ilə ölümsüzlük qazanan, şəhid olan qardaşlarımızın adlarını yaşadacaq, əbədiləşdirəcəyik. Biz ön cəbhədə qəhrəmanlıq dastanı yazdıq, Ali Baş Komandan İlham Əliyev və onun timsalında bütün Azərbaycan xalqının vətənpərvərliyi, qətiyyəti, əzmi və iradəsi ilə bunlara nail olduq”.
Digər çıxış edənlər də Respublika Veteranlar Təşkilatı ilə əməkdaşlığı bundan sonra da davam etdirəcəklərinə, üzərilərinə düşən işin icrasına məsuliyyətlə yanaşacaqlarına əminlik bildiriblər.
Bölmənin digər xəbərləri
