Rumıniyada Çauşesku rejiminin devrilməsinin ildönümü qeyd olunur
Buxarest, 22 dekabr, AZƏRTAC
Rumıniyada 1989-cu il dekabr inqilabının - Çauşesku rejiminin devrilməsinin 34-cü ildönümü qeyd olunur.
AZƏRTAC xəbər verir ki, bu münasibətlə ölkədə çoxsaylı anım tədbirləri, hərbi və dini mərasimlər keçirilir. Rumıniya Parlamentinin Deputatlar Palatası və Senatında da təntənəli iclaslar olub.
Xatırladaq ki, 1989-cu il dekabrın 21-də Buxarestdə hakimiyyətə dəstək aksiyası hökumət əleyhinə nümayişlə nəticələnib. Nümayişçilərlə təhlükəsizlik qüvvələri arasında qarşıdurma gecə boyu davam edib. Dekabrın 22-də ən yüksəkvəzifəli dövlət məmurları Nikolae Çauşesku başda olmaqla Rumıniya Kommunist Partiyasının Mərkəzi Komitəsinin binasından helikopterlə qaçıb.
Həmin günlərdə Rumıniyanın gələcək Prezidenti İon İliyeskunun rəhbərlik etdiyi Milli Qurtuluş Cəbhəsinin yaradıldığı elan edilib. Dekabrın 25-də inqilabi tribunalın hökmünə əsasən, Çauşesku Buxarestdən 80 kilometr aralıda yerləşən Tarqovişte şəhərində güllələnib.
Bundan sonra ölkədə əsaslı dəyişikliklər həyata keçirilib. 1989-cu ilin dekabr inqilabı Rumıniya tarixində əsas hadisələrdən biri hesab olunur.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
