Rusiyalı ekspert: Azərbaycanın parlaq müstəqilliyi Qərbi tam qane etmir
Bakı, 28 avqust, N.Məmmədova, AZƏRTAC
Bütün Avrasiya məkanı fonunda Azərbaycanın parlaq müstəqilliyi Qərbi tam qane etmir. Bununla belə görünür ki, aparıcı Qərb ölkələri Bakı ilə münasibətlərə xələl gətirməməyə çalışır.
Bu barədə AZƏRTAC-a xarici siyasət, müdafiə və təhlükəsizlik sahəsində rusiyalı ekspert Qriqori Trofimçuk bir sıra Qərb ölkələri xarici işlər nazirliklərinin ötən həftə səsləndirdiyi anti-Azərbaycan bəyanatlar dalğasını şərh edərkən deyib.
“Bu gözlənilən idi. Çünki bu, Bakıya təsir etmək üçün yeganə praktiki vasitədir. Şübhəsiz ki, Qərb Bakının daha “üzüyola” olmasını istəyərdi. Bütün Avrasiya məkanı fonunda Azərbaycanın parlaq müstəqilliyi Qərbi tam qane etmir. Bununla belə, görünür ki, aparıcı Qərb ölkələri qeyd olunan kampaniyaya daha kiçik ifaçıları daxil edərək, Bakı ilə münasibətlərə xələl gətirməməyə çalışırlar. Bütövlükdə bunlar Bakının möhkəmliyini yoxlamaq üçün sınaqdır”, - deyə Agentliyin həmsöhbəti qeyd edib.
Onun sözlərinə görə, Qərbdə başa düşürlər ki, “Ukrayna hadisələrinin aydınlaşması Cənubi Qafqazda da çox şeyi dəyişəcəkdir”, buna görə də “Bakının yeni startını təxmin etməyə, qabaqcadan öyrənməyə çalışırlar”. “Hələ ki, onlar Türkiyə-Azərbaycan tandeminə qarşı heç nə edə bilmirlər: bu müasir zamanın ən güclü hərbi-siyasi ittifaqlarından biridir. Bu müttəfiqlərin opponentlərində heç nə alınmır. Misal üçün, İran-Ermənistan, Hindistan-Ermənistan və hətta Fransa-Ermənistan kimi xaotik əməkdaşlıqlar Ankara-Bakı vəhdətinə yaxın da dura bilmirlər”, - deyə beynəlxalq ekspert vurğulayıb.
Qərbin yeni anti-Azərbaycan isteriyasının məqsədlərinə gəldikdə, Qriqori Trofimçuk onların arasında Bakının aktivliyinin azalması və Qarabağ ətrafındakı vəziyyəti növbəti ləng hərəkət edən zolağa salmaqla onu müəyyən proqnozlaşdırıla bilən çərçivələrə daxil edilməsini göstərib. “Laçın yolu ətrafındakı hadisələr də daxil olmaqla, Bakının artıq çoxdan Qarabağda şərtlərini diktə etməsi Qərbin xoşuna gəlmir. Vəziyyətin bu nöqtəyə gəlib çatması gözlənilməz idi. Bakının Moskva ilə ehtiyatlı davranması da onların xoşuna gəlmir. Nəticədə Qərbin istəyi ilə bütün Cənubi Qafqazın yenidən formatlaşdırılmasına çıxış irəli sürülür. Hiss olunur ki, azərbaycanlı ekspertlərin əhəmiyyətli hissəsi 2025-ci il ərəfəsində Rusiya Federasiyasına da çəp baxır (məhz həmin ildə üçtərəfli Bəyanata əsasən, Rusiya sülhməramlı kontingentinin regionda beşillik dislokasiya müddəti bitir - red.). Lakin RF 2020-ci ilin payızında olduğu kimi deyil, Qarabağ istiqamətində onu hansısa dəhşətli planlarda ittiham etmək çətindir. Qərb üçün ideal variant RF yaxınlığında yeni bir müharibədir”, - deyə o hesab edir.
Rusiyalı ekspertin fikrincə, görünür ki, Bakı siyasi təbiətin yazılmayan qanunlarının olduqca inadcıl və dəyişkən olduğunu başa düşür və vəziyyəti öz nöqteyi-nəzərindən peşəkarcasına götür-qoy edir. Lakin o, Moskvaya münasibətdə öz mövqeyinin və addımlarının dəyişməzliyini nümayiş etdirməsi də daxil olmaqla, planın qeyri-hərbi realizə üsullarında praktik həddə çatıb. “Rusiyanın bütün qonşuları, düzünü desək - burada heç bir sirr yoxdur, - Ukrayna proseslərinin inkişafını gözləyərək, artıq heç nə etməyə bilərlər. Artıq onların nəticəsindən asılı olaraq özlərinin əsas qərarlarını qəbul edə bilərlər. “SSRİ-nin ikinci süqutu” nəzəriyyəm çərçivəsində mən artıq demişəm ki, postsovet məkanında ilk zərbədən, 1991-ci ildə “böyük partlayış”dan sonra yaranan bütün ölkələrin heç də hamısı qalmayacaq. Hesab edirəm ki, Azərbaycan bu dar çevrəyə daxildir”, - deyə Qriqori Trofimçuk sözlərini yekunlaşdırıb.
Bölmənin digər xəbərləri
