“Samsung” yerli rəqiblərin çoxalması səbəbindən Çin bazarını tərk edir
Pekin, 7 may, AZƏRTAC
Cənubi Koreyanın “Samsung Electronics” şirkəti Çin bazarında televizorlar və monitorlar da daxil olmaqla bütün məişət texnikası məhsullarının satışını dayandırır.
AZƏRTAC şirkətin açıqlamasına istinadla xəbər verir ki, qərar sürətlə dəyişən bazar şərtləri diqqətlə nəzərdən keçirildikdən sonra verilib. Satışı dayandırılacaq məhsullara kommersiya displey sistemləri, kondisionerlər, soyuducular, paltaryuyan maşınlar, audio avadanlıqlar, tozsoranlar və hava təmizləyiciləri daxildir.
Çin media orqanı “DoNews”un istinad etdiyi sənaye məlumatları göstərir ki, cari ilin aprelinə “Samsung”un Çindəki bazar payı televizorlar üçün 3,62 faiz, soyuducular üçün 0,41 faiz və paltaryuyan maşınlar üçün 0,38 faiz təşkil edib.
“Samsung”un çətinlikləri yalnız Çinlə məhdudlaşmır. “Yonhap” xəbər agentliyinin məlumatına görə, artan qlobal qeyri-müəyyənliklər, habelə xammal və komponent xərclərinin qiymətlərinin bahalanması şirkətin məişət texnikası biznesində gəlirliliyi azaltmağa davam edib. Ötən il “Samsung”un televizor və məişət texnikası bölmələri, ümumilikdə 200 milyard Koreya vonu (təxminən 138 milyon dollar) zərər ediblər. Eyni dövrdə “Samsung”un Çindəki satış şirkətinin xalis mənfəəti illik müqayisədə 44 faiz azalıb. Bu dəyişiklik Çin brendlərinin daxili bazar paylarını davamlı olaraq genişləndirməsi ilə əlaqədardır. Çin sənaye məlumat təminatçısı “Runto Technology”yə görə, 2025-ci ildə Çində ümumi televizor tədarükü 32,895 milyon ədədə çatıb. Ən yaxşı 8 yerli brend – “Hisense”, “TCL”, “Xiaomi”, “Skyworth”, “Changhong”, “Haier”, “Konka” və “Huawei” bazarın 94,1 faizini təşkil edib. Sorğuya əsasən, “Samsung”, “Sony”, “Philips” və “Sharp” da daxil olmaqla əsas xarici brendlərin illik tədarükü 1 milyon ədəddən aşağı düşüb və bazarın ən aşağı hissəsində qalıb.
“Yonhap”ın məlumatına görə, “Samsung” Çində mobil cihazlar, yarımkeçiricilər və tibbi avadanlıq sektorlarında fəaliyyətini davam etdirəcək.
Bölmənin digər xəbərləri
