SƏBAİL RAYON QADINLAR CƏMİYYƏTİ XOCALI FACİƏSİ İLƏ BAĞLI SORĞU KEÇİRMİŞDİR
Bakı, 21 fevral (AZƏRTAC). 1992-ci il fevralın 25-dən 26-na keçən gecə XX əsrin ən böyük faciəsi - Xocalı soyqırımı baş vermişdir. Həmin gün erməni silahlıları və onların havadarları Azərbaycanın bu şəhərində 613 nəfəri qətlə yetirmiş, 487 nəfəri yaralamış, 1275 nəfəri əsir götürmüş, 6 ailəni tamamilə məhv etmişlər. Şəhər isə yandırılmışdır.
Bu günlərdə Səbail Rayon Qadınlar Cəmiyyətinin sədri Almara Hümmətovanın rəhbərliyi ilə qurumun təmsilçiləri faciə ilə əlaqədar rayonun orta ümumitəhsil məktəblərində, bir sıra ali təhsil ocaqlarında sorğu kecirmişlər. Məqsəd gənclərin Xocalı soyqırımı haqqında məlumatlılıq dərəcəsini öyrənmək idi.
Şəhər 7 nömrəli pilot məktəbində, 49 və 6 nömrəli intellekt liseylərində, 132, 163, 190 nömrəli orta məktəblərdə, 134 nömrəli Beynəlxalq Təhsil Kompleksində, Qərb Universitetində və onun nəzdindəki orta ümumitəhsil məktəbində və s. keçirilmiş sorğuda gənclərə bir sıra suallar təklif olunmuşdur. Onların arasında cinayəti kimin törətməsi, soyqırımı qurbanlarının sayı, faciə haqqında aldıqları məlumatın mənbəyi və başqa suallar var idi.
Sorğular göstərmişdir ki, 132, 6, 49, 190, 7 nömrəli orta ümumtəhsil məktəblərinin şagirdləri faciə haqqında daha geniş məlumata malikdilər.
Ümumiyyətlə, sorğuya cəlb olunanlar tarixi düşmənlərimiz və onların havadarlarını yaxşı tanıyır, Xocalı soyqırımının xalqımızın məruz qaldığı yeganə faciə olmadığını bilir, ermənilərin əməllərinə münasibətdə unutqanlığımızı pisləyirlər. Onlar Azərbaycanın ərazi bütövlüyü uğrunda döyüşlərdə həlak olmuş Vətən övladlarına dərin ehtiram bəsləyir, xatirələrini əziz tuturlar. Demək olar, respondentlərin hamısı torpaqlarımızın azad ediləcəyinə inanır və bu müqəddəs işdə iştirak etməyə hazırdırlar.
Bölmənin digər xəbərləri
