SƏBAİL RAYONUNDA XOCALI FACİƏSİNİN İLDÖNÜMÜ İLƏ BAĞLI ANIM MƏRASİMİ KEÇİRİLMİŞDİR
Bakı, 26 fevral (AZƏRTAC). Səbail rayonunda da Xocalı faciəsinin ildönümü geniş şəkildə qeyd olunmuşdur. Tədbirlər planına uyğun olaraq, rayonun bütün orta və ali məktəblərində faciə ilə bağlı sərgilər və müxtəlif tədbirlər keçirilmişdir. Fevralın 26-da rayondakı bütün orta məktəblərdə ilk dərslər Xocalı faciəsinə həsr olunmuşdur.
Tədbirlər çərçivəsində fevralın 20-də Səbail rayon məktəbləri arasında Xocalı soyqırımının ildönümünə həsr olunmuş ənənəvi güllə atıcılığı üzrə növbəti birincilik keçirilmiş, qaliblərə Fəxri fərmanlar və qiymətli hədiyyələr təqdim olunmuşdur.
Fevralın 25-də Səbail rayon Qarabağ Müharibəsi Veteranları və Şəhid Ailələri İctimai Birliyinin qərargahında rayonda məskunlaşmış Xocalı ailələrinin nümayəndələri ilə görüş keçirilmişdir. Anım mərasimində Azərbaycan xalqının qan yaddaşı olan Xocalı faciəsinin, ermənilərin əsrlər boyu xalqımıza qarşı törətdikləri vəhşiliklərlə bağlı həqiqətlərin dünya ictimaiyyətinin diqqətinə çatdırılması üçün görülməsi vacib olan işlər barədə ətraflı söhbət aparılmışdır.
Badamdar qəsəbə mədəniyyət evinin Xalq Teatrının üzvləri ədəbi-bədii kompozisiya ilə toplaşanlar qarşısında çıxış etmiş, Xocalı faciəsi zamanı və bütövlükdə Qarabağ müharibəsində həlak olmuş soydaşlarımızın xatirəsinə dualar oxunmuşdur.
Tədbirdə çıxış edənlər Azərbaycan Prezidenti İlham Əliyevin apardığı məqsədyönlü siyasət nəticəsində Xocalının düşməndən azad ediləcəyi, ölkəmizin ərazi bütövlüyünün bərpa olunacağı günü səbirsizliklə gözlədiklərini və bu günün tezliklə gələcəyinə əminliklərini bildirmişlər.
Tədbirin sonunda rayonda məskunlaşmış Xocalı köçkunlərinə maddi yardım göstərilmişdir.
Fevralın 26-da rayondakı bütün orta məktəblərdə ilk dərslər Xocalı faciəsinə həsr olunmuşdur.
Bölmənin digər xəbərləri
