Bakı, 5 dekabr, Günel Alıyeva, AZƏRTAC

AZƏRTAC Azərbaycanın populyar blogerləri ilə müsahibələr silsiləsini davam etdirir. Növbəti həmsöhbətimiz bu yola çox kiçik addımlarla başlayan, amma əzmkarlığı və səmimiyyəti sayəsində əsl uğur simvoluna çevrilən bloger və sahibkar Şəfəq Məmmədova oldu. Şəfəq uğurlu aksesuar brendi yaratdı və daha sonra şəxsi səhifəsini minlərlə insanı ruhlandıran platformaya çevirdi. AZƏRTAC-ın müxbiri ilə söhbətində Şəfəq uğura necə çatmasından danışıb, yeni başlayan bloqçulara faydalı məsləhətlər verib.

- Şəfəq, bloqunuzu yaradanda nədən başladınız?

- Hər şey mənim aksesuar brendimdən başladı. Məhsullarımı tanıtmaq üçün səhifə yaratdım, zaman keçdikcə o, diqqəti cəlb etdi. Brend məşhurlaşan kimi insanlar bu layihənin arxasında kimin dayandığı ilə maraqlanmağa başladılar. Bütün fərziyyələri dayandırmaq üçün şəxsi səhifə yaratdım, xüsusi nəsə gözləməsəm də bu səhifə mənim bütün gözləntilərimi üstələdi. Mən bunun üçün qeyri-adi heç nə etmirdim - sadəcə gündəlik həyatımı göstərirdim: iş, gündəlik rutin, evdə etdiklərimi bölüşürdüm. Ətrafda hamı öz iddialı həyatını nümayiş etdirərkən mən bazara alış-veriş üçün necə getdiyimi, özümə necə paltar tikdiyimi göstərirdim. Bu təzad diqqət çəkdi.

- Yaradıcı nəşrlər üçün ideyaları haradan götürürsünüz?

- Düzünü desəm, bunun üçün xüsusilə heç nə axtarmıram. Məzmunun əksəriyyəti həyatımdan real hadisələrdir, dərc etməzdən əvvəl onların üzərində bir qədər işləyirəm. Mənim ilham mənbəyim səyahətlərdir. Mən səyahətə tək çıxanda başıma maraqlı əhvalatlar gəlir, sonra onları “canlandırıram”. Həm də mən musiqini çox sevirəm - bu, ailəvi xüsusiyyətdir. Mən çox vaxt maşında mahnı oxuyuram və videoları paylaşıram, onlar da populyarlaşır. Əsas odur ki, mükəmməl görünməyə çalışmayın, özünüz necə varsınız elə olun. İnsanlar səmimiyyəti hiss edir və bunu bəyənirlər.

- Bloqunuz yaranandan bəri necə dəyişib?

- Zaman keçdikcə tanınmış brendlər, o cümlədən aviaşirkətlər mənim haqqımda öyrəndilər. Məhz o zaman anladım ki, bloqum sadəcə şəxsi səhifədən daha böyük bir nəyəsə çevrilib. Sonra səyahətlərim və işbirliyim daha tez-tez oldu. İndi bloqum təkliflərə uyğun olaraq inkişaf edir və bu mənim xoşuma gəlir.

- Bloq və biznesi eyni zamanda birləşdirmək çətindirmi?

- Xeyir, çünki mənim başıma gələnlər təbii şəkildə baş verir. Mən bütün fəaliyyətlərimi ahəngdar şəkildə birləşdirməyi bacarıram və birbaşa işdən məzmun yarada bilirəm, çünki bu, həyatımın vacib hissəsidir.

Mənim iki biznesim var: aksesuar satışı və tortun bişirilməsi. Bütün bunları bloqumda nümayiş etdirirəm, ona görə də iş və yaradıcılıq bir-biri ilə sıx bağlıdır. Təbii ki, gərgin günlər olur, amma sevdiyin işlə məşğul olanda bu, yorğunluq deyil, zövq verir.

- Hələ tələbəlik illərində sizi biznes qurmağa nə vadar etdi?

- Ailəmizin maddi vəziyyəti ağır idi. Pul qazanmağın yolunu tapmaq lazım idi. Həm də uşaqlıqdan zərgərlik məmulatları yaratmağı çox sevdiyim üçün məhsullarımı satmağa başladım. Daha sonra anamla birlikdə başladığımız çörəkçilik biznesi də əlavə oldu.

- Səyahətə olan sevginizlə işi necə birləşdirə bilirsiniz?

- Mən həmişə səfərlərimi diqqətlə planlaşdırıram və şəhərdə adamların az olduğu həftəsonunu və ya bayram günlərini seçirəm. Üstəlik, mən olmadığım zaman işlərin öhdəsindən çox gözəl gələn etibarlı komandam var. Bunun sayəsində işin öz axarı ilə getdiyini bilərək, rahat şəkildə səfərə çıxa bilərəm.

- Siz “Avrovizion” həyəcanını da yaşamısınız. Müsabiqənin hansı məqamı sizin üçün ən parlaq və yaddaqalan olub?

- “Avrovizion” mənim uşaqlıq arzum olub və bu möhtəşəm tədbirdə olarkən özümü nağıldakı kimi hiss edirdim. Mənim üçün ən parlaq xatirə inanılmaz işıq görüntüsü və tamaşaçıların əllərini qaldıraraq parlayan bilərziklərlə necə idarə etməsidir. Minlərlə insan eyni anda əllərini qaldırarkən bütün arena saysız-hesabsız işıqlarla parlamağa başladı. Bu, həqiqətən sehrli bir mənzərə idi və mən onu hələ də həyəcanla xatırlayıram.

- Getdiyiniz ölkələrdən hansı birisi daha çox yaddaqalan oldu?

- Məni ən çox Niderland, xüsusən də Amsterdam heyran etdi. Düzünü desəm, hətta deyə bilərəm ki, bir gün köçüb orada yaşayacağam. Bu, artıq səfər etdiyim 36-cı ölkədir. Amsterdam məni öz ab-havası ilə valeh etdi. İsveçrə də məni heyran etdi. Alp dağları heyrətamizdir. Bu gözəllikdən insan gözünü ayıra bilmir. İnsan gözlərinə inana bilmir ki, təbiət bu qədər gözəl ola bilər.

- Sizcə, 10 ildən sonra bloqçuluq ölkəmizdə necə inkişaf edəcək?

- Düşünürəm ki, o, yeni səviyyəyə yüksələcək. Artıq qlobal səviyyəyə çıxmış blogerlərimiz var və bu, hörmətə layiqdir. Onlar qlobal tendensiyalara əməl edir, Milan və Parisdə moda həftələri kimi tədbirlərdə iştirak edirlər. Bütövlükdə, bizim xalqın estetik zövqü yüksəkdir. Biz başqa ölkələrdən ən yaxşı ideyaları mənimsəməyi və onları daha gözəl şəkildə həyata keçirməyi bacarırıq. Əminəm ki, 10 ildən sonra ölkəmizdə bloqçuluq yüksək səviyyəyə çatacaq. Onu da qeyd etmək istəyirəm ki, blogerlərimiz çox zəhmətkeşdirlər. Bizim həyata keçirdiyimiz çəkilişləri və layihələri başqalarında çox az görmək olar.

- Səyahətlə maraqlanan yeni başlayan blogerlərə nə məsləhət verərdiniz?

- Qonşu ölkələrə səfərlərdən başlamaq lazımdır. İlk səfər həmişə bir az qorxulu olur. Avropaya ilk dəfə gedəndə məni daim belə bir fikir təqib edirdi: “Əgər nəsə baş verərsə, mən burada kimə müraciət edə bilərəm?” Səyahətə tək çıxanda hər şeyin yalnız səndən asılı olduğunu dərk etməyə başlayırsan və bu, məsuliyyət hissini aşılayır. Buna görə də Türkiyə, Gürcüstan və Rusiyadan başlamağı tövsiyə edirəm. Bu ölkələrdə həmişə həmvətənlərlə rastlaşmaq olar və yalnız bundan sonra təcrübə qazanaraq dünyanın daha uzaq guşələrinə gedə bilərsiniz.