SİYASƏT
Səfir: Öz ərazilərində “boz zona”ları ləğv etmək Azərbaycanın hüququdur
Roma, 20 sentyabr, AZƏRTAC
Öz suveren ərazilərində “boz zona”ları ləğv etmək Azərbaycanın hüququdur.
AZƏRTAC xəbər verir ki, bu fikirləri Azərbaycanın İtaliyadakı səfiri Rəşad Aslanov AGI informasiya agentliyinə müsahibəsində səsləndirib.
Səfir qeyd edib ki, 2020-ci ilin noyabrında üçtərəfli Bəyanatın imzalanmasından sonra Ermənistanın bütün silahlı qüvvələrini ərazilərimizdən çıxarmaq öhdəliyi var idi, lakin bunu etmədi. Əksinə, üç ilə yaxındır ki, Ermənistan öz silahlı qüvvələrini Azərbaycan ərazisində saxlayır, onları maliyyələşdirir, hər cür hərbi texnika və yardım göstərirdi. Qarabağda illərdir Azərbaycan vətəndaşlarına terror törədən 10 min qanunsuz erməni əsgəri var idi və bu terrora son qoyulmalı idi. Ötən gün erməni separatçılarının Xocavənd rayonu ərazisində basdırdıqları tank əleyhinə minaya düşən iki avtomobilin partlaması nəticəsində 2 mülki şəxs və 7 polis əməkdaşı həlak olub. İndiyədək 320 nəfər mina qurbanı olub, onlardan 60-dan çoxu 2020-ci ilin 44 günlük Vətən müharibəsindən sonra həlak olub.
R.Aslanov Qarabağda baş verənləri şərh edərkən bildirib ki, Qarabağ iqtisadi rayonunda törədilən genişmiqyaslı təxribatların qarşısının alınması, üçtərəfli Bəyanatın müddəalarının təmin olunması, Ermənistan silahlı qüvvələrinin birləşmələrinin tərk-silah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycanın konstitusiya quruluşunun bərpa edilməsi məqsədilə bölgədə lokal xarakterli antiterror tədbirləri həyata keçirilib. Öz ərazilərimizdə “boz zona”ları ləğv etmək bizim hüququmuzdur. Xatırlatmaq istərdim ki, Azərbaycanda “Dağlıq Qarabağ” adlanan inzibati ərazi vahidi yoxdur. Azərbaycan Respublikasının suveren ərazisində Qarabağ iqtisadi rayonu mövcuddur ki, antiterror tədbirləri burada həyata keçirilib. Antiterror tədbirlərinin hədəfi yalnız qeyri-qanuni hərbi birləşmələr və hərbi infrastruktur olub, mülki əhali və infrastruktur obyektləri hədəfə alınmayıb.
Səfir qeyd edib ki, Azərbaycan Qarabağın erməni sakinlərinin nümayəndələrinin müraciətini nəzərə alaraq 2023-cü il sentyabrın 20-də saat 13:00-da lokal xarakterli antiterror tədbirlərini dayandırıb. Qarabağ bölgəsində yerləşən Ermənistan silahlı qüvvələrinin birləşmələrinin, qeyri-qanuni erməni silahlı dəstələrinin silahı yerə qoymaları, döyüş mövqelərindən və hərbi postlardan çıxmaları və tam şəkildə tərk-silah olunması, eləcə də Ermənistan silahlı qüvvələrinin birləşmələrinin Azərbaycan ərazilərini tərk etməsi, qeyri-qanuni erməni silahlı dəstələrinin buraxılması, paralel şəkildə bütün silah-sursat və ağır texnikanın təhvil verilməsi ölkəmiz tərəfindən qarşıya şərt qoyulub. Bundan başqa, sentyabrın 21-də Qarabağın erməni sakinlərinin nümayəndələri ilə Yevlaxda görüş keçiriləcək, onların Azərbaycan Konstitusiyası və qanunları əsasında reinteqrasiya məsələləri müzakirə ediləcək.
“Azərbaycan Prezidentinin dəfələrlə vurğuladığı kimi, ölkəmizdə regionla bağlı bütün məsələlər daxili məsələlərdir. Qarabağdakı ermənilər Azərbaycanın vətəndaşı kimi orada yaşaya və Konstitusiyamızın mənşəyindən asılı olmayaraq hər bir vətəndaşımıza verdiyi hüquqlardan istifadə edə bilərlər”, - deyə diplomat bildirib.
R.Aslanov vurğulayıb ki, Azərbaycanın erməni silahlı qüvvələrinin bölmələrinin Qarabağ bölgəsində olmasının regional sülh və sabitliyə ciddi təhdid yaratdığını dəfələrlə bəyan edib. Bölgədə sülh və sabitliyə nail olmağın yeganə yolu Ermənistan silahlı qüvvələrinin Azərbaycanın Qarabağ bölgəsindən qeyd-şərtsiz və tam çıxarılması və marionet rejiminin ləğv edilməsidir.
Diplomat Azərbaycan ilə İtaliya arasında əlaqələrin strateji tərəfdaşlığa əsaslandığını, ölkəmizin Azərbaycanın təklif etdiyi Ermənistanla sülh gündəliyinin irəliləməsi üçün həqiqətən faydalı olan bütün səmimi vasitəçilik təşəbbüslərini yüksək qiymətləndirdiyini deyib.
O, 30 ilə yaxın müddət ərzində Azərbaycan ərazilərinin 20 faizinin Ermənistan tərəfindən işğal edildiyini, azərbaycanlılara qarşı etnik təmizləmə həyata keçirildiyini, həmin ərazilərdən 750 mindən çox məcburi köçkün və Ermənistandan olan 250 mindən çox qaçqının olduğunu və onların hələ də öz yurd-yuvalarına qayıtmağı gözlədiyini xatırladıb.
Nihad Budaqov
AZƏRTAC-ın xüsusi müxbiri
Roma