Şəhid Maarif Səfərovun atası: Vətən sevgisini hər şeydən uca tutdu VİDEO
Cəlilabad, 23 oktyabr, İsmayıl Cəfərli, AZƏRTAC
Düz beş il öncə o, Vətənə olan sevgisini hər şeydən uca tutdu. Könüllü şəkildə döyüş meydanına atıldı və şəhidlik zirvəsinə ucaldı. Növbəti süjetimizdə döyüş yolunu şərəflə addımlamış şəhid Maarif Səfərovdan danışacağıq.
AZƏRTAC xəbər verir ki, Cəlilabad şəhərində dünyaya gələn bu gəncin həyatı qısa olsa da, onun qəhrəmanlığı bir ömür boyu yadda qalacaq. Maarif Səfərov 1997-ci ilin mayında Cəlilabadda doğulub. O, Beynəlxalq İslam Elmləri Akademiyasının Təbriz filialında təhsil alırdı. İlahiyyatçı idi, amma Vətən sevgisi onun bütün düşüncələrinin mərkəzində dayanırdı. Atası Mikayıl Səfərov deyir ki, Maarif əsgərlik illərini “Murov” dağı ərazisindəki hərbi hissədə xidmət etmişdi. Komandiri general-mayor Polad Həşimov idi. 2020-ci ilin iyul ayında Tovuz istiqamətində baş verən təxribatlar zamanı Polad Həşimovun şəhid olması xəbəri onu çox sarsıtdı. Deyirdi ki, mən də onun yolunu davam etdirəcəyəm. Bu arzusu 2020-ci ilin sentyabrın 27-də gerçəkləşdi. Təhsilini yarımçıq qoyub cəbhəyə yollandı: “Mənim oğlum Vətəni bizim hamımızdan üstün tutdu. Vətən uğrunda da şəhid oldu”.
Maarif haqq savaşımızın 25-ci günü Füzuli, Cəbrayıl, Qubadlı istiqamətlərində gedən ən mürəkkəb döyüşlərdə mərdlik göstərdi. 2020-ci il oktyabrın 21-də Qubadlı istiqamətində gedən ağır döyüşlərin birində şəhidlik zirvəsinə ucaldı. Şəhidin anası Tamara Səfərova deyir: “Oğlum fürsət tapıb evlə əlaqə saxlayanda hər dəfə bizdən halallıq istəyərdi, artıq oğlumuzun məqamı bizə bəlli idi. Mənim oğlum ilahiyyatçı idi. Vətəni ürəkdən sevirdi. Elə ona görə də Vətəni seçdi. Şəhadətə ucaldı. Mənim qardaşım da 1994-cü ildə şəhid olmuşdu, o da könüllü idi. Oğlum mənə axırıncı dəfə zəng vuranda dedi, ana muştuluğumu ver, dedim nədir? Dedi, Füzulini aldıq, dayımın qisasını aldıq. Onda çox sevindim”.
Şəhidin qardaşı Mahir Səfərov: “Evdə də mehriban bir insan olub, yəni o, yaşasaydı da, şəhid məqamında idi. Allahın seçdiyi məqam var, şəhidlər seçilmişlərdir. Allah bütün şəhidlərimizin ruhunu şad eləsin. Şəhid analarına, atalarına və yaxınlarına səbir diləyirəm”.
Maarif Səfərov qısa, amma mənalı ömür sürdü. O, hər zaman 23 yaşında igidlik timsalı kimi yaddaşlarda qalacaq. Ölümündən sonra “Cəbrayılın azad olunmasına görə”, “Qubadlının azad olunmasına görə”, “Cəsur döyüşçü”, “Vətən uğrunda” medalları və 3-cü dərəcəli “Vətənə xidmətə görə” ordeni ilə təltif olunub. Cəlilabad şəhərində yaşadığı küçə onun adına əbədiləşdirilib.
Bölmənin digər xəbərləri
