MƏDƏNİYYƏT
Şəhriyar adına Mədəniyyət Mərkəzində Lermontova həsr edilmiş tədbir olacaq
Bakı, 25 noyabr, AZƏRTAC
Noyabrın 30-da saat 13:30-da “Mixail Yuryeviç Lermontov və Qafqaz” respublika layihəsi çərçivəsində Şəhriyar adına Mədəniyyət Mərkəzində dahi rus şairi və yazıçısı Mixail Lermontovun anadan olmasının 210 illiyinə həsr olunmuş qala gecəsi keçiriləcək.
AZƏRTAC xəbər verir ki, layihədə respublikanın müxtəlif regionlarından - Bakı, Sumqayıt, Gəncə, Xaçmaz, Quba, Qusar, Şabran, Zaqataladan, həmçinin Rusiya, Qazaxıstan və Qırğızıstandan 700-dən çox məktəbli və tələbə iştirak edib.
Bakıdakı Rus evi, Azərbaycanın Rus İcması, Rusiyalı Həmvətənlərin Koordinasiya Şurası və Azərbaycanın Rusdilli Təhsil Müəssisələrinin Müəllimləri Assosiasiyasının təşkilatçı qismində iştirak etdiyi layihə çərçivəsində müxtəlif müsabiqələr – Lermontovun şeirlərinin və dram əsərlərinin quruluşlarının bədii qiraəti, “M.Y. Lermontov - dünya ədəbiyyatının dahisi, peyğəmbər, şair” mövzusunda multimedia təqdimatları, “Qafqazın mavi dağları, sizi salamlayıram!” mövzusunda multimedia təqdimatları olacaq.
Bu layihənin qalibi olmuş şagirdlərin müəllimləri Pyatiqorsk şəhərindəki M.Y. Lermontov muzeyini də ziyarət ediblər.
Layihənin qaliblərinə sertifikatlar və xatirə hədiyyələri təqdim ediləcək.
Bölmənin digər xəbərləri
