Səmərqənddə Birinci Beynəlxalq Qardaşlaşmış Şəhərlər Forumu keçiriləcək
Bakı, 23 iyul, AZƏRTAC
Beynəlxalq bələdiyyələrarası əlaqələrin inkişafında mühüm hadisələrdən biri iyulun 24-də Səmərqənddə keçiriləcək Birinci Beynəlxalq Qardaşlaşmış Şəhərlər Forumu olacaq. Tədbirdə Azərbaycanın bələdiyyələrinin nümayəndə heyətinin, həmçinin müxtəlif ölkələrdən şəhər rəhbərlərinin, ekspertlərin, işgüzar dairələrin və ictimai təşkilatların təmsilçilərinin iştirakı gözlənilir.
Bu sözləri AZƏRTAC-a müsahibəsində Qlobal Cənub QHT Platformasının üzvü, Özbəkistanın Qardaşlaşmış Şəhərlər Alyansının sədri Zakir Abidov deyib.
O qeyd edib ki, Forum qabaqcıl təcrübənin mübadiləsi, ticarət-iqtisadi, investisiya, turizm, elm-təhsil və mədəni-humanitar əməkdaşlıq perspektivlərinin müzakirəsi, həmçinin şəhər və regionlar arasında yeni birbaşa əlaqələrin qurulması üçün nüfuzlu platformaya çevriləcək.
“Tədbir çərçivəsində Xankəndi ilə Namanqan, eyni zamanda, Astara ilə Nukus şəhərləri arasında yeni qardaşlaşmış şəhər münasibətlərinin yaradılması məsələsinə baxılması təklif olunur. Bu təşəbbüslərin həyata keçirilməsi Özbəkistan ilə Azərbaycan arasında regionlararası əməkdaşlığın coğrafiyasını genişləndirəcək, iqtisadiyyat, sahibkarlıq, turizm, mədəniyyət, təhsil və innovasiya sahələrində birgə layihələrin reallaşdırılması üçün möhkəm zəmin yaradacaq”, - deyə Zakir Abidov əlavə edib.
Müsahibənin tam variantı tezliklə yayımlanacaq.
Bölmənin digər xəbərləri
