Şərəfli bir mübarizənin hekayəsi…
Azərbaycanın Milli Qəhrəmanı Koroğlu Rəhimovun anadan olmasının 71-ci ildönümüdür
Bakı, 31 oktyabr, AZƏRTAC
Vətənin müdafiəsi üçün canını fəda edən, haqqın və ədalətin qorunmasında mübarizə aparan insanların hekayəsi yalnız döyüş meydanlarında deyil, həm də insanların qəlbindəki qəhrəmanlıq ruhunun simvoludur. O qəhrəman ki, əzmkarlığı, cəsarəti və fədakarlığı ilə tanınır. O, torpağını, xalqını, millətini qorumaq üçün çətinliklərə sinə gərir. Onun hər bir addımı azadlıq və ədalətlə doludur. Vətən üçün döyüşmək, yalnız fiziki mübarizə deyil, eyni zamanda, mənəvi məsələdir, insanların qəlbindəki ümidi, inamı doğrultmaqdır. Vətənin həmin qəhrəmanları müharibənin dəhşətlərinə, iztirablara və itkilərə baxmayaraq, daima öz ideallarından geri dönməyərək, daha parlaq bir gələcək üçün mübarizəni davam etdirirlər. Onların cəsarəti, yalnız özləri üçün deyil, bütün nəsillər üçün bir örnəkdir. Onlar əslində insanlığın və vətənsevərliyin ən ali dəyərlərini təcəssüm etdirir və unudulmaz izlər buraxaraq gələcək nəsillərə ilham verirlər. AZƏRTAC Vətən uğrunda canını fəda etmiş, heç vaxt xalqının qəlbindən silinməyəcək, unudulmayacaq həmin qəhrəmanlardan birinin – bu gün dünyaya gəlməsinin 71-ci ildönümü olan Azərbaycanın Milli Qəhrəmanı Koroğlu Rəhimovun həyat hekayəsini təqdim edir.
Koroğlu İsmayıl oğlu Rəhimov 1953-cü il oktyabrın 31-də Azərbaycanın Oğuz rayonunun Xaçmaz kəndində dünyaya göz açıb. O, müəllim ailəsində böyüyüb və onun anası Sura xanım evdar qadın olub. Kiçik yaşlarından bəri fəal olan Koroğlu sanki həyatının gələcək hadisələrini qabaqcadan hiss edirdi. O, təhsilinə Oğuz rayonunun Yaqublu kəndindəki yeddiillik məktəbdə başlayıb.
1961-ci ildə Koroğlunun atası İsmayıl müəllim öz dədə-baba yurdu olan Qərbi Azərbaycanımızın Zəngibasar mahalındakı Sarcalar kəndinə köçüb. Koroğlu Rəhimov orta təhsilini Həbilkənd orta məktəbində başa vurub. 1969-cu ildə orta məktəbi bitirən kimi Bakıya gələrək Azərbaycan Neft və Kimya İnstitutunun Avtomexanika fakültəsinə daxil olub. 1972-ci ildə orduya çağırılaraq hərbi xidmətini Almaniya Demokratik Respublikasında yerinə yetirib. Xidmətdən qayıtdıqdan sonra isə ali təhsilini tamamlayıb.
1979-cu ildə Koroğlu əmisi qızı Aybəniz xanımla ailə həyatı qurub. Onların üç övladı (Rəşad, Samir və Ülviyyə), eləcə də beş nəvəsi (Koroğlu, Mətin, Əzizağa, Fateh və Mələk) var. Koroğlu Rəhimov əmək fəaliyyətinə Bakı Məişət Kondisionerləri Zavodunda başlayıb. Sakit təbiətli, vətənpərvər və ailəsinə bağlı bir şəxsiyyət idi. Vətən sevgisi ilə yaşayan qəhrəmanımızı ermənilərin törətdikləri faciələr qəzəbləndirirdi.
1988-ci ildə azərbaycanlıların Ermənistandan qovulması, 1990-cı ilin Qanlı “20 Yanvar” hadisələri və 1992-ci ildəki Xocalı soyqırımı Koroğlunun düşmənə qarşı qəzəbini daha da artırdı. Bu hadisələrdən təsirlənən Koroğlu könüllü olaraq cəbhəyə getmək qərarını ailəsinə bildirib. Atası mərd bir oğul böyütdüyü üçün qürur duyaraq ona xeyir-duasını verib.
1992-ci il martın 17-də Koroğlu Rəhimov Azərbaycan Milli Ordusunun sıralarına könüllü olaraq yazılıb. Aprelin 30-da isə o, N saylı hərbi hissənin ikinci motoatıcı bölüyünün komandiri təyin olunub. Qısa müddət ərzində onun qəhrəmanlığı dillərdə əzbərə çevrilib.
Koroğlu Rəhimov Qarabağ cəbhəsindəki döyüşlərə qatılaraq Goranboy rayonunun Buzlaq, Çantaz və Erkəc kəndlərinin azad edilməsində qəhrəmanlıq göstərib. Bu əməliyyatlar nəticəsində çoxlu sayda düşmən məhv edilib, bir neçəsi isə əsir götürülüb. Həmçinin Başkənd, Madagiz və Gülüstan kəndlərini də düşməndən təmizləyib. 1992-ci il iyulun 3-də Koroğlunun bölüyü Ağdərə istiqamətində hücuma keçib və bu, onun son döyüşü olub. Koroğlu Rəhimov Ağdərə yaxınlığında üçüncü sovxozu azad edərkən qəhrəmancasına şəhidlik zirvəsinə ucalır. Bu xəbər hər kəsi sarsıtmışdı. Koroğlu Rəhimovun məzarı Bakı şəhərindəki Şəhidlər xiyabanındadır. Ölümündən sonra qəhrəmanlığı ilə bağlı müxtəlif qəzetlərdə yazılar dərc olunub.
Koroğlu Rəhimov 1994-cü il sentyabrın 16-da Ulu Öndər Heydər Əliyevin Fərmanı ilə Azərbaycanın Milli Qəhrəmanı adına layiq görülüb. Onun döyüş yolu Abdulla Qurbaninin “Koroğlunun Ağdərə səfəri”, Əli Qurbaninin “Koroğlular uzaqdan gələn yolda”, Qədir Aslanın “XX əsrin Koroğlusu”, Oqtay Əliyevin “Əbədiyyətə qovuşan Koroğlu” kitablarında geniş təsvir olunub. Həmçinin 2-ci sinif “Oxu” kitabında da onun haqqında hekayə və Oqtay Rzanın “İki Koroğlu” şeiri yer alıb.
Koroğlu Rəhimov haqqında “XX əsrin Koroğlusu” adlı sənədli film çəkilib. Bakıda və doğulduğu Oğuz rayonunda Koroğlu Rəhimovun adını daşıyan küçələr var. Onun adı və qəhrəmanlığı bütün Azərbaycan xalqının yaddaşında əbədi olaraq qalacaq və nəsildən-nəslə ötürüləcək.
Qürurvericidir ki, Müzəffər Ali Baş Komandan İlham Əliyevin rəhbərliyi ilə şanlı Ordumuz bütün torpaqlarımızı işğaldan azad etdi, ölkəmizin ərazi bütövlüyü və suverenliyi tam bərpa olundu, şəhidlərimizin qanı yerdə qalmadı. Allah bütün şəhidlərimizə rəhmət eləsin!
Bölmənin digər xəbərləri
