Seul Pxenyanla gərginliyi azaltmaq üçün təbliğat xarakterli radiostansiyanın yayımını dayandırıb
Bakı, 1 sentyabr, AZƏRTAC
Cənubi Koreyanın Milli Müdafiə Nazirliyi Pxenyanla gərginliyi azaltmaq məqsədi ilə Şimali Koreyaya qarşı yönəlmiş “Azadlığın səsi” təbliğat radiostansiyasının yayımını dayandırıb.
AZƏRTAC xəbər verir ki, stansiya 2010-cu ildə Cənubi Koreyaya məxsus “Çeonan” hərbi gəmisinin batmasından sonra yayıma başladığı 15 il ərzində ilk dəfə efirdən çıxıb.
“Reuters” xəbər verir ki, VOF Cənubi Koreya tərəfindən Şimali Koreyaya qarşı psixoloji müharibə alətlərindən biri kimi istifadə edilib.
1950-1953-cü illər münaqişəsi sülh müqaviləsi ilə deyil, atəşkəslə başa çatdığı üçün Koreya yarımadasının iki dövləti texniki cəhətdən müharibə vəziyyətindədir.
Cənubi Koreya Prezidenti Li Çje Myon iyun ayında vəzifəyə gəldikdən qısa müddət sonra onun administrasiyası qonşusu ilə dialoqu bərpa etmək məqsədilə Şimali Koreyanı tənqid edən sərhəd təbliğat yayımlarını kəsib. O, Şimali Koreya ilə gərginliyi azaltmaq istiqamətində əlavə addımlar atmağa söz verib və sülhə vasitəçilik etmək üçün ABŞ Prezidenti Donald Tramp və Şimali Koreya lideri Kim Çen In arasında görüş keçirməyi təklif edib. Lakin Şimali Koreya Cənubi Koreya Prezidentinin təkliflərini indiyədək rədd edib.
Bölmənin digər xəbərləri
