SİNQAPURDA YARADILMIŞ ROBOT XEOPS EHRAMININ SİRRİNİ AÇACAQ
Misirin görkəmli arxeoloqlarından olan Zahi Həvvass demişdir ki, şaxtalar və onları kəsən daş panellər firon Xeopsun əvvəllər dəfn edildiyi naməlum kameranı gizlədə bilər. Bu isə o demək olar ki, ehramda qabaqlar aşkarlanmış kameralardan heç biri dəfn kamerası deyildir.
Şaxtada tədqiqatlar axırıncı dəfə 2002-ci ildə aparılmışdır. Robot panellərdən birində burğu ilə deşik açmış, lakin bundan sonra qarşıya daha bir panel çıxmışdır. Ehramı öyrənmək üçün Sinqapurda xüsusi olaraq yaradılan robot ikinci paneldə burğu ilə deşik açacaq və ikinci şaxtanı eyni yolla təmizləyəcəkdir.
20x20 santimetr kəsimində olan və ehramın daxilində tikintisi yarımçıq qalan kameradan başlanan bu iki şaxta 1872-ci ildə aşkara çıxarıldığı vaxtdan alimlərə dinclik verməmişdir. Misirşünaslardan bəzilərinin fikrincə, onlardan ventilyasiya üçün istifadə edilirmiş. Digərləri hesab edirlər ki, bunlar fironun ruhunun gedib əbədi həyata qovuşduğu dəhlizlərdir.
Həvvass, demək olar, əmindir ki, şaxtalar alimləri yeni kəşflərə gətirib çıxaracaqdır.
Robotun sınaqları yaxın həftə üçün nəzərdə tutulubdur.
Xeops ehramı Qədim Misirin ən uca ehramıdır – onun hündürlüyü 146,6 metrdir.
Bölmənin digər xəbərləri
