Şirvanda keçirilən konfransda Azərbaycanın suverenlik yolunun tarixindən danışılıb
Şirvan, 28 may, Aydın Yavərzadə, AZƏRTAC
Şirvan Şəhər İcra Hakimiyyəti, Şirvan Apellyasiya Məhkəməsi və Şirvan Regional Ədliyyə İdarəsinin birgə təşkilatçılığı ilə “Konstitusiya və Suverenlik İli” çərçivəsində Müstəqillik Gününə həsr olunmuş “Azərbaycanın suverenlik yolunun tarixi” mövzusunda konfrans keçirilib.
AZƏRTAC xəbər verir ki, tədbirdə Şirvan Şəhər İcra Hakimiyyətinin başçısı İlqar Abbasov, Şirvan Apellyasiya Məhkəməsinin sədri Vəli Abdullayev, Şirvan Regional Ədliyyə İdarəsinin rəisi Nizami Hüseynov, şəhərin hüquq-mühafizə orqanlarının, regional təşkilatların, idarə və müəssisələrin rəhbərləri, şəhid ailəsi üzvləri və ictimaiyyət nümayəndələri iştirak ediblər.
Konfrans iştirakçıları öncə Ümummilli Lideri Heydər Əliyevin abidəsini ziyarət ediblər.
Tədbir Dövlət Himninin səsləndirilməsi ilə başlayıb, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub.
Çıxış edənlər bildiriblər ki, 1918-ci il mayın 28-də Azərbaycan xalqı dünya tarixinə öz azadlıq iradəsini bəyan edib. Məhz həmin gün Şərqdə ilk parlamentli, demokratik və dünyəvi respublika yaradılıb. Bu, xalqımızın dövlətçilik tarixində qürurverici bir dönüş nöqtəsi olub.
Diqqətə çatdırılıb ki, XX əsrin sonunda müstəqilliyini bərpa edən Azərbaycan Ulu Öndər Heydər Əliyevin siyasi təfəkkürü, idarəçilik təcrübəsi və çoxşaxəli fəaliyyəti sayəsində Azərbaycan Xalq Cümhuriyyətinin taleyini yaşamaqdan, yəni qısa zamanda müstəqilliyini itirməkdən xilas olub. Bildirilib ki, Ulu Öndər Heydər Əliyev həmin dövrdə müstəqilliyimizi qorudu və müasir, güclü, nüfuzlu dövlət kimi çıxış edən, regionda lider ölkəyə çevrilən Azərbaycanın təməlini qoydu.
Qeyd edilib ki, Ümummilli Lider Heydər Əliyevin rəhbərliyi ilə hazırlanan və 1995-ci ildə ümumxalq səsverməsi ilə qəbul edilən Azərbaycan Respublikasının Konstitusiyası ölkəmizin hüquqi, demokratik və dünyəvi dövlət kimi inkişafının əsasını təşkil edir. Bu Konstitusiya yalnız hüquqi sənəd deyil, həm də Ulu Öndərin dövlət idarəçiliyi fəlsəfəsini özündə əks etdirən mühüm siyasi irsdir. Prezident İlham Əliyevin rəhbərliyi ilə bu siyasi xətt uğurla davam etdirilir. Vurğulanıb ki, 2025-ci ilin ölkəmizdə “Konstitusiya və Suverenlik İli” elan edilməsi Azərbaycanın dövlətçilik tarixində mühüm hadisədir. Ermənistanın işğalçılıq siyasətinə son qoyulması və ölkəmizin ərazi bütövlüyünün, suverenliyinin bərpa edilməsi Azərbaycan xalqının milli ideyasının əsas məqsədlərindən idi. 2020-ci il sentyabrın 27-də Ermənistanın növbəti təxribatlarına cavab olaraq başlanan, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılan tarixi Zəfər və 2023-cü ilin sentyabrında həyata keçirilmiş lokal antiterror tədbirləri nəticəsində Azərbaycan öz ərazi bütövlüyünü və dövlət suverenliyini tam bərpa edib. Bu qələbələr ölkəmizin tarixində yeni mərhələnin başlanğıcını qoyub.
Daha sonra Ulu Öndər Heydər Əliyevin Azərbaycanın müstəqilliyinin möhkəmləndirilməsindəki tarixi rolunu əks etdirən “Əbədiyyətin ilk əsri” sənədli filmi nümayiş olunub.
Bölmənin digər xəbərləri
