Siyasi ekspert: 20 Yanvar millətimizin azadlıq və istiqlal mübarizəsini simvolizə edən qəhrəmanlıq rəmzidir
Bakı, 20 yanvar, AZƏRTAC
Bir çox həmyaşıdlarım kimi, mən də 1990-cı il yanvarın 20-də sovet ordusunun hərbi birləşmələri tərəfindən mərkəzi hakimiyyətin xalqımıza qarşı ədalətsiz münasibətinə dinc etirazını bildirən həmvətənlərimizə necə divan tutulduğunun şahidiyəm. SSRİ mərkəzi hakimiyyətinin xüsusi hazırlıq keçmiş, xalqımıza qarşı nifrət üzərində köklənmiş hərbi cinayətkar dəstələri dinc insanlara, uşaqlara, qadınlara, yaşlılara qarşı xüsusi amansızlıq nümayiş etdirirdilər. Gözümüzün önündə binalar, evlər yaylım atəşinə tutulur, yalın əlindən, yumruğundan başqa silahı olmayan insanlar xəbərdarlıq edilmədən qətlə yetirilirdilər.
Bu fikirləri AZƏRTAC-a açıqlamasında politoloq, siyasi ekspert Elçin Mirzəbəyli bildirib.
Siyasi ekspertin sözlərinə görə, bütün bu davranışlar sübuta yetirirdi ki, sovet ordusunun hərbi birləşmələri Azərbaycana, o cümlədən paytaxt Bakıya, cani Mixail Qorbaçov başda olmaqla bir sıra SSRİ rəsmilərinin iddia etdiyi kimi “etirazları yatırmaq” üçün deyil, xalqımıza qarşı qırğın törətmək, onu cəzalandırmaq üçün yeridiliblər. Məqsəd isə Qarabağın Azərbaycandan qoparılmasına qarşı ayağa qalxan azərbaycanlıların iradəsini qırmaqdan, bizi təslimçiliyə sövq etməkdən, Azərbaycan xalqının timsalında azadlığına qovuşmaq üçün dinc mübarizə aparan digər xalqların da gözünü qorxutmaq idi.
O qeyd edib ki, M.Qorbaçov öz uğursuz “yenidənqurma siyasəti”nə tabe etdirməyə çalışdığı xalqlara, SSRİ-nin subyekti olan respublikalara Bakıda, Azərbaycan xalqını qırğına verməklə “dərs keçmək” istəyirdi. Amma son nəticədə bunun əksinə nail oldu. 20 Yanvar qətliamı SSRİ-yə olan inamı kökündən sarsıtdı və “xalqlar həbsxanası”nın süqutunu daha da tezləşdirdi.
20 Yanvar faciəsini xatırlayarkən, heç şübhəsiz, həmin dövrdə tamamilə informasiya blokadasında olan, təklənmiş, küncə sıxışdırılmış xalqımızın müqavimətinin davam etdiyini və bu prosesdə ümummilli lider Heydər Əliyevin tarixi xidmətini xüsusi vurğulamaq lazımdır. Çünki məhz Ulu Öndərin Azərbaycan xalqına divan tutulması barədə əmrin verildiyi şəhərdə - Moskvada yerləşən daimi nümayəndəliyimizdə keçirdiyi mətbuat konfransı xalqımızın mübarizə əzminin qırılmamasında, müstəqillik uğrunda mübarizəsinin davam etdirilməsində müstəsna rol oynadı.
"Ümummilli lider Heydər Əliyev öz xalqının fədakar oğlu və cəsarətli lideri kimi SSRİ-nin mərkəzi hakimiyyətinin bütün təzyiq və təhdidlərinə baxmayaraq, azərbaycanlıların öz hüquqları uğrunda dinc etiraza qalxdıqlarını bütün dünyaya çatdırmağı bacardı, M.Qorbaçovun və ətrafının 1990-cı il yanvarın 20-də baş verənlərlə bağlı dünyaya uydurduqları yalanları darmadağın etdi. Heydər Əliyevin qətiyyətli və cəsarətli mövqeyi nəticəsində Moskvanın xalqımıza vurmağa çalışdığı “ekstremist”, “terrorçu” damğası dinc insanlara divan tutan cinayətkar ordunun və qətliamın siyasi sifarişini verənlərin alnına basıldı”, - deyə E.Mirzəbəyli qeyd edib.
Siyasi ekspert vurğulayıb ki, 20 Yanvar Azərbaycan xalqının nümayiş etdirdiyi müqavimət əzmi millətimizin azadlıq və istiqlal mübarizəsini simvolizə edən, tariximizdə, yaddaşımızda dərin izlər buraxan qəhrəmanlıq rəmzidir. Bu hadisədən 32 il vaxt keçməsinə baxmayaraq, xalqımız və dövlətimiz 20 Yanvar şəhidlərinin xatirəsini əziz tutur, öz azadlığı naminə həyatını qurban verməyə hazır qəhrəmanların varisləri olduğumuzu, müstəqilliyimizin ana südü qədər bizə halal olduğunu bütün dünyaya nümayiş etdirir.
E.Mirzəbəylinin fikrincə, 20 Yanvardan ötən dövr ərzində ölkəmiz çox böyük çətinliklərdən keçib, torpaqlarımız işğal altına düşüb, lakin ulu öndər Heydər Əliyev və Prezident İlham Əliyevin strateji düşüncələri bizi bir millət və dövlət olaraq yenidən dirçəltdi, məğlub toplumdan qalib xalqa çevirdi. Bu gün bütün şəhidlərimizin ruhu şaddır. Onlar Azərbaycan xalqının yaddaşında bütöv Azərbaycanın qəhrəmanları kimi əbədiyyətə qədər yaşayacaqlar.
Bölmənin digər xəbərləri
