Soltan Məmmədov: Ermənistanın götürdüyü öhdəlikləri yerinə yetirməsi regionda sülhün yaradılmasının başlıca formuludur
Bakı, 12 oktyabr, AZƏRTAC
Ermənistan tərəfindən Azərbaycan ərazilərinin 30 ilə yaxın müddətdə işğal altında saxlanılması regional təhlükəsizliyi təhdid edən əsas problem idi. Bu gün bu maneə aradan qaldırılıb və indi davamlı sülhün təmin olunması üçün unikal fürsət yaranıb.
Bu fikirləri AZƏRTAC-a açıqlamasında Milli Məclisin deputatı Soltan Məmmədov deyib.
Azərbaycanın Cənubi Qafqazda sülh və əməkdaşlıq mühitinin yaradılması üçün hər zaman ardıcıl mövqe nümayiş etdirdiyini xatırladan deputat vurğulayıb ki, Vətən müharibəsindən sonra imzalanmış üçtərəfli Bəyanatın bəzi müddəalarının Ermənistan tərəfindən yerinə yetirilməməsi bu ölkənin ənənəvi təcavüzkar siyasətini davam etdirmək niyyətinin göstəricisi idi.
S.Məmmədov qeyd edib ki, Azərbaycan Ermənistandan fərqli olaraq regional problemlərin bilavasitə region ölkələrinin iştirakı ilə həll edilməsinin tərəfdarı olub. Rəsmi Bakının irəli sürdüyü “3+3” əməkdaşlıq formatı Cənubi Qafqazda açıq qalan və mübahisə doğuran məsələlərin konstruktiv ruhda müzakirəsi üçün ən effektiv platforma ola bilər. “Lakin təəssüf ki, biz Ermənistan hakimiyyətinin tamamilə fərqli və qeyri-adekvat addımlarının şahidi oluruq. Bəzi üçüncü ölkələr isə bu prosesdə qeyri-konstruktiv mövqedən çıxış edərək, vəziyyəti gərginləşdirməyə çalışır. Belə ölkələrdən biri də Fransadır. Cənab Prezident də MDB-yə üzv dövlətlərin təhlükəsizlik və xüsusi xidmət orqanları rəhbərləri şurasının 53-cü iclasının iştirakçılarını qəbul edərkən vurğuladı ki, Fransa 2020-ci ildən başlayaraq qeyri-konstruktiv və təxribatçı mövqedən çıxış edir. Yeri gəlmişkən qeyd edim ki, Fransanın Avropa və xarici işlər naziri Katrin Kolonanın Senatda çıxışı zamanı Azərbaycana qarşı səsləndirdiyi əsassız iddialar da bu qərəzli siyasətin davam etdirildiyini göstərir”, - deyə o əlavə edib.
Deputat bildirib ki, Azərbaycan Ermənistanla münasibətlərin normallaşmasının tərəfdarıdır. Çünki bölgədə sülh, əməkdaşlıq və rifahın təmin olunması üçün sülh sazişinin imzalanması vacib əhəmiyyət kəsb edir. Azərbaycan bu məsələdə istənilən ölkənin, beynəlxalq təşkilatın vasitəçilik təşəbbüsünü alqışlayır. Lakin bu cür təşəbbüslər səmimi və tərəfsiz olmalıdır. Biz isə onu müşahidə edirik ki, bəzi ölkələr Azərbaycana qarşı əsassız ittihamlarla, böhtanlarla çıxış edir. Qərəzli bəyanatlar səsləndirir. Eyni zamanda, Azərbaycanla Ermənistan arasında münasibətlərin normallaşması üçün vasitəçilik etməyə hazır olduğunu bəyan edir. Bu, yumşaq ifadə etsək, tamamilə anlaşılmaz bir mövqedir. Digər tərəfdən, vasitəçilik missiyasının ən vacib prinsipi tərəfsizlikdir. Ona görə də birmənalı olaraq Ermənistanı dəstəkləyən, beynəlxalq hüququn fundamental prinsiplərini nəzərə almayan dövlətlərin vasitəçilik missiyası heç bir nəticə verə bilməz. Bu, tamamilə səmərəsiz bir mexanizm olacaq”.
Soltan Məmmədov qeyd edib ki, Ermənistanın öz üzərinə götürdüyü öhdəlikləri yerinə yetirməsi Cənubi Qafqazda davamlı sülhün yaradılmasının başlıca formuludur. Regiondan uzaq bəzi dövlətlərin bölgədəki proseslərə müdaxilə etmək cəhdləri münasibətlərin normallaşmasına müsbət töhfə vermir.
Bölmənin digər xəbərləri
