SON MƏNZİLƏ
Noyabrın 29-da ölkəmizin ictimaiyyəti respublikamızın tanınmış ictimai xadimi, Qadın Problemləri üzrə Dövlət Komitəsinin sədri, əməkdar elm xadimi, tibb elmləri doktoru, professor Zəhra Tahir qızı Quliyevanı son mənzilə yola salmışdır.
Mərhumun cənazəsi Azərbaycan Tibb Universitetinin matəmsayağı bəzədilmiş böyük akt salonunda postament üzərində qoyulmuşdu. Postamentin qarşısında tanınmış ictimai xadimin və alimin təltif edildiyi orden və medallar, ətrafında isə Heydər Əliyev Fondu, Səhiyyə Nazirliyi, Qadın Problemləri üzrə Dövlət Komitəsi, Azərbaycan Tibb Universiteti və başqa qurumlar adından əklillər düzülmüşdü.
Salonda həzin matəm musiqisi səslənirdi. Respublikanın tanınmış elm, mədəniyyət və ictimai xadimləri cənazənin yanında fəxri qarovulda dayanırdılar.
Heydər Əliyev Fondunun, Azərbaycan Mədəniyyətinin Dostları Fondunun prezidenti, YUNESKO-nun xoşməramlı səfiri Mehriban Əliyeva, dövlət və hökumət nümayəndələri vidalaşma mərasiminə gəldilər, mərhumun ailə üzvlərinə başsağlığı verdilər.
Matəm mitinqini Azərbaycan Tibb Universitetinin rektoru, akademik Əhliman Əmiraslanov açaraq dedi ki, Zəhra Quliyeva böyük və şərəfli həyat yolu keçmişdir. O, 1940-cı ildə 132 nömrəli məktəbdə təhsilini başa vuraraq Azərbaycan Tibb İnstitutuna qəbul olunmuş, ali məktəbi əla qiymətlərlə qurtardığına görə, burada göz xəstəlikləri kafedrasında ordinator vəzifəsində saxlanılmışdır. 1958-ci ildə namizədlik, 1967-ci ildə doktorluq dissertasiyası müdafiə etmişdir. Zəhra xanım ömrünün axırınadək göz xəstəlikləri kafedrasında müxtəlif vəzifələrdə çalışmış, 1975-ci ildən kafedra müdiri işləmişdir. 1971-ci ildən institutun tədris hissə üzrə prorektoru, 1972-ci ildən 1983-cü ilə qədər rektoru vəzifələrində çalışan Zəhra Quliyeva gənc kadrların yetişdirilməsində, elmi potensialın gücləndirilməsi sahəsində göstərdiyi səylərə görə tibb ictimaiyyətinin dərin hörmət və ehtiramını qazanmışdır. Zəhra Quliyeva oftalmologiyanın problemlərinə həsr olunmuş neçə-neçə monoqrafiyanın, 200-ə yaxın elmi məqalənin müəllifidir.
O, 1975-ci ildə Azərbaycan Oftalmologiya Cəmiyyətinin sədri seçilmişdi.
Zəhra xanım dünyanın bir çox ölkəsində keçirilən müxtəlif beynəlxalq konfrans və simpoziumlarda Azərbaycan elmini təmsil etmişdir.
Qadın Problemləri üzrə Dövlət Komitəsi sədrinin birinci müavini Dilruba Camalova, akademiklər Böyükkişi Ağayev, Ədilə Namazova, Milli Məclisin deputatı Bahar Muradova, ATU-nun dosenti, mərhumun ilk tələbələrindən olan Solmaz Əliyeva matəm mərasimində çıxış edərək, Zəhra xanıma Allah-təaladan rəhmət dilədilər, son vaxtlarda yetişən oftalmoloqların bütöv bir nəslinin onun “Göz xəstəlikləri” kitabından mötəbər mənbə kimi istifadə etdiyini xatırlatdılar.
Vurğulandı ki, ümummilli liderimiz Heydər Əliyevin Sərancamı ilə 1998-ci ildən ömrünün sonunadək Azərbaycan Respublikasının Qadın Problemləri üzrə Dövlət Komitəsinin sədri vəzifəsində işləyən Zəhra Quliyeva ölkəmizdə qadın hüquqlarının müdafiəsi, gender bərabərliyi, qadınlara qarşı ayrı-seçkiliyin ləğvi və digər problemlərlə bağlı BMT-nin mötəbər məclisində, beynəlxalq elmi simpoziumlarda Azərbaycanı ləyaqətlə təmsil etmişdir. O, dəfələrlə SSRİ Ali Sovetinin, rayon və Bakı şəhər sovetlərinin deputatı seçilmişdir. Zəhra xanımın dövlət və xalq qarşısında xidmətləri yüksək qiymətləndirilərək, bir çox mükafatlara layiq görülmüş, müstəqil Azərbaycan Respublikasının ali mükatlarından olan “Şöhrət” ordeni ilə təltif edilmişdir.
Mərhumun ailəsi adından qızı Cəmilə Səttarova çıxış edərək, anasının xatirəsinə göstərilən hörmət və ehtirama görə Azərbaycan Prezidenti İlham Əliyevə, onun xanımı Mehriban Əliyevaya dərin minnətdarlığını bildirdi, matəm mərasiminin iştirakçılarına təşəkkür etdi.
Mehriban Əliyeva mərhumun ailə üzvlərinə bir daha başsağlığı verdi, onlara Allah-təaladan səbir dilədi.
Zəhra xanımın ailə üzvləri, qohumları mərhumla vidalaşdılar.
X X X
Zəhra Quliyevanın cənazəsi Tibb Universitetinin binasından qaldırılaraq ikinci Fəxri xiyabana gətirildi. Burada mərhumun ruhuna dua oxundu. Əziz xatirəsi onu tanıyanların qəlbində əbədi yaşayacaq alim və ictimai xadim Zəhra Tahir qızı Quliyevanın cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun.
Bölmənin digər xəbərləri
